'भाजप'च्या मदतीची आस ठेवूनच खा. कृपाल तुमानेंची शिंदे गटाला साथ

शिवसेनेच्या भरवशावर रामटेकचा गड राखणे कठीण, भाजपचे ग्रामीणमध्ये प्राबल्य

कमलेश वानखेडे

नागपूर : दहा दिवसांपूर्वीच आपण पक्षप्रमुख उद्धव ठाकरे यांच्यासोबतच आहोत, असे सांगणारे रामटेकचे शिवसेनेचे खासदार कृपाल तुमाने हे मंगळवारी मुख्यमंत्री एकनाथ शिंदे गटात सहभागी झाले. तुमाने हे गेल्या दोन टर्मपासून रामटेकच्या गडावर शिवसेनेचा भगवा फडकवीत आहेत. मात्र, असे असले तरी भाजपच्या मदतीशिवाय रामटेकचा गड सर करणे सोपे नाही. शिंदे गटात सहभागी झालो तरच भाजपची साथ मिळेल व पुढील मार्ग सुकर होईल, ही दूरदृष्टी ठेवूनच तुमाने यांनी तसा निर्णय घेतला असावा, असा राजकीय तज्ज्ञांचा अंदाज आहे.

रामटेक लोकसभेसाठी शिवसेनेचा उमेदवार रिंगणात असतो. पण खरी निवडणूक लढते ती भाजपच. ही वास्तविकता आहे. भाजपचे जिल्हाभरात प्रतयेक गावागावात तगडे नेटवर्क आहे. २०१४ च्या विधानसभा निवडणुकीत भाजप व शिवसेना युती तुटली. त्यावेळी दोन्ही पक्षांची जिल्ह्यात खरी ताकद किती याचा अंदाज आला. त्यावेळी भाजपच्या उमेदवारांना मिळालेली एकूण मते ही शिवसेनेच्या उमेदवाराला मिळालेल्या मतांच्या तिप्पट होती.

मुख्यमंत्री एकनाथ शिंदेंचा थेट शिवसेनेवर दावा?; निवडणूक आयोगाला लिहिलं पत्र

नागपूर ग्रामीणमध्ये भाजप सावनेर वगळता उर्वरित पाच मतदारसंघांत लढली होती. भाजपला एकूण ४ लाख ३२ हजार ९८० मते मिळाली, तर शिवसेनेला १ लाख ६३ हजार मते मिळाली. यातही सावनेर विधानसभेत भाजप रिंगणात नसल्याने शिवसेनेच्या उमेदवाराला भाजपने मदत केली होती.

हिंगणा व उमरेड मतदारसंघांत शिवसेना १० हजारांच्या आत, तर काटोल व कामठी मतदारसंघात १५ हजारांच्या आतच निपटली होती.

भाजपची साडेचार लाखांवर व्होट बँक

• रामटेक लोकसभेत भाजपची स्वत:ची सुमारे साडेचार लाखांवर व्होट बँक आहे. ही मते काही केल्या इकडची तिकडे होत नाहीत.
• जिल्ह्यातील ८ नगर परिषदेत भाजपचा तर फक्त कन्हान या एकमेव नगर परिषदेत शिवसेनेचा नगराध्यक्ष आहे.
• जिल्हा परिषदेत भाजपचे १४ सदस्य असून शिवसेनेचा एकमेव सदस्य आहे.
• नगर पंचायत व जिल्हा परिषदेतील मतदानाची गोळाबेरीज तर ती ५ लाखांवर आहे. शिवसेना या मतांच्या सुमारे चार पट मागे आहे. त्यामुळे एवढी मोठी व्होट बँक सोडून केवळ शिवसेनेच्या बाणावर निवडून येणे तुमाने यांना तेवढे सोपे नव्हते.

आ. जयस्वालांमुळे गड आधीच पोखरला

२०१४ मध्ये आ. आशीष जयस्वाल हे भाजपविरोधात शिवसेनेकडून लढले होते. त्यावेळी त्यांना ४७ हजार २६२ मते मिळाली होती. २०१९ मध्ये भाजप-सेना युती झाली व युतीत रामटेकची जागा भाजपला गेली. त्यावेळी जयस्वाल अपक्ष लढले व विजयी झाले. त्यांना ६७ हजार ४१९ मते मिळाली होती. जयस्वाल यांच्या रूपात शिवसैनिक असलेला एकमेव आमदार शिंदे गटात गेल्यामुळे रामटेकचा गड आधीच पोखरला गेला होता. त्यामुळे शिवसेनेची लोकसभेची वाट आणखी कठीण झाली होती. याचाही धसका तुमाने यांनी घेतला असावा.

तुमाने यांना मिळालेली मते

२००९ -२,९४,९१३

२०१४ - ५,१९,८९२

२०१९ - ५,९७,१२६