अविवाहित सांगून लग्नाचे आमीष दाखवित युवतीचे शोषण; आरोपीविरुद्ध गुन्हा दाखल

दोन मुलीच्या पित्याचे कृत्य

नागपूर : पत्नी आणि दोन मुली असताना आपण अविवाहित असल्याचे सांगून एका २३ वर्षीय युवतीचे शारीरिक शोषण करणाऱ्या आरोपीविरुद्ध बेलतरोडी पोलिसांनी गुन्हा दाखल केला आहे.

मनिष वेणुधर बुरडकर (वय ३३, रा. साईनगर २, बसस्टॉपजवळ हुडकेश्वर) असे आरोपीचे नाव आहे. मनिष हा विवाहित असून त्याला पत्नी आणि दोन मुली आहेत. तो इंटेरिअर डिझायर म्हणून काम करतो. दोन वर्षापूर्वी पिडीत २३ वर्षीय युवती इंटर्नशीप करायची असल्यामुळे आरोपी मनिषच्या संपर्कात आली. मनिषनेही आपण अविवाहित असल्याचे सांगून तिच्याशी जवळीक केली. त्याने तिला प्रेमाच्या जाळ्यात ओढून तिच्याशी शारिरीक संबंध प्रस्थापित केले. डिसेंबर २०२१ ते मे २०२३ दरम्यान आरोपी मनिषने लग्नाचे आमीष दाखवून युवतीला बेलतरोडी पोलिस ठाण्याच्या हद्दीत हॉटेल, फार्म हाऊसमध्ये नेऊन तिच्या इच्छेविरुद्ध शारीरिक संबंध केले.

युवतीने लग्नासाठी हट्ट केल्यानंतर आरोपी मनिषने तिला हॉटेलमध्ये तसेच फार्म हाऊसमध्ये बंद करून तिला शिविगाळ करून मारहाण केली. तसेच तिचे फोटो व व्हिडिओ व्हायरल करण्याची धमकी दिली. आपली फसवणूक झाल्याचे लक्षात येताच युवतीने बेलतरोडी ठाण्यात तक्रार दिली. बेलतरोडीचे सहायक पोलिस निरीक्षक अविनाश कराड यांनी आरोपी मनिषविरुद्ध कलम ३७६ (२), (एन), ३४२, २९४, ३२३, ५०४, ५०६ नुसार गुन्हा दाखल केला. आरोपी सध्या बाहेरगावी गेल्याची माहिती असून पोलिस त्याचा शोध घेत आहेत.