लग्न करतो सांगून तरुणीवर केली जबरदस्ती; तिच्या भावाला पाठविला व्हिडीओ

Nagpur News लग्नाचे आमिष दाखवून तरुणीसोबत संबंध प्रस्थापित केले. ते करताना काढला व्हिडिओ आणि नंतर तरुणीने नकार दिल्यावर हा व्हिडिओ तिच्या भावाला पाठवून तिला धमकावल्याची घटना नागपुरात घडली.

ठळक मुद्देगडचिरोली जिल्ह्यातील आरोपीविरुद्ध गुन्हा दाखल

नागपूर : रोजगाराच्या निमित्ताने नागपुरात राहणाऱ्या गडचिरोली जिल्ह्यातील एका तरुणीला लग्नाचे आमिष दाखवून गावातील आरोपीने तिच्यावर दोन वर्षात वारंवार बलात्कार केला. ती विरोध करीत असल्याने तिच्या भावाच्या मोबाईलवर अश्लील व्हिडीओ पाठवून तिला आणि कुटुंबीयांना मानसिक त्रास दिला.

चंद्रकुमार लिंबाजी कापगते (वय ३५) असे आरोपीचे नाव असून, तो कुरखेडा तालुक्यातील रहिवासी आहे.

तक्रार करणारी तरुणी नागपुरातील सक्करदऱ्यात एका खासगी इस्पितळात कर्मचारी आहे. तीन वर्षांपूर्वी आरोपी कापगते तिच्या गावात राहायला गेला होता. त्यामुळे त्याच्यासोबत तिची ओळख होती. २०१९ मध्ये तो एकदा तिच्याकडे नागपुरात आला. ‘तू मला खूप आवडते, तुझ्याशी लग्न करायचे आहे’, असे म्हणून त्याने तिला सीताबर्डी येथील एका हॉटेलमध्ये नेले. तेथे त्याने तिच्याशी शरीरसंबंध प्रस्थापित केले. यावेळी मोबाईलमध्ये शरीरसंबंधाची क्लिप तयार केली. त्यानंतर तो तिच्याकडे वारंवार शरीरसंबंधाची मागणी करू लागला.

त्याचे लग्न आधीच झाले आहे, अशी माहिती मिळाल्यामुळे तरुणीने त्याच्यासोबत बातचीत बंद केली. ती टाळत असल्याचे पाहून आरोपी कापगते तिला शरीरसंबंधाची अश्लील क्लिप व्हायरल करण्याची धमकी देऊन तिच्यावर बलात्कार करू लागला. अलीकडे तिने त्याला जोरदार विरोध केल्यामुळे काही दिवसापूर्वी आरोपीने तरुणीच्या भावाच्या मोबाईलवर ही अश्लील क्लिप पाठविली. हिच्यासोबत माझे संबंध असल्याचे त्याला सांगितले. भावाने तिला यासंबंधाने जाब विचारला. त्यामुळे तरुणीने सक्करदरा पोलीस ठाण्यात तक्रार नोंदविली. पोलिसांनी झिरो क्राईमी करून प्रकरण बुधवारी रात्री सीताबर्डी ठाण्यात पाठविले. ठाणेदार अतुल सबनीस यांनी आरोपी कापगतेविरुद्ध बलात्कार करून ब्लॅकमेल करण्याच्या आरोपाखाली गुन्हा दाखल केला. पुढील तपास सुरू आहे.

---