पती ऐवजी प्रियकराला लावला जीव, त्यानेही केली नाही तिची कीव

सुखी संसार सुरू असताना तिचे दुसऱ्याशी सुत जुळले. तिने पतीला सोडले व प्रियकरासोबत संसाराची स्वप्न पाहू लागली. प्रियकराने मात्र, लग्नाचे आमीष दाखवून तिचे शोषण केले व नंतर तो मी नव्हेचची भूमिका घेऊन तिला वाऱ्यावर सोडले.

ठळक मुद्देशारिरीक शोषण करुन सोडले वाऱ्यावर

नागपूर : सुखाचा संसार सुरू होता. मुलगाही पाच वर्षांचा झाला. परंतु तरीसुद्धा एका ३० वर्षाच्या महिलेचे एका व्यक्तीसोबत सुत जुळले. अन् पतीला सोडून ती प्रियकराच्या प्रेमात आकंठ बुडाली. तिला लग्नाचे आमीष दाखवून त्याने वेळोवेळी तिचे शारिरीक शोषण केले. नंतर तो मी नव्हेचची भूमिका घेऊन तिला वाऱ्यावर सोडले. तिच्या तक्रारीवरून वाठोडा पोलिसांनी प्रियकराविरुद्ध गुन्हा दाखल केला आहे.

सुनिता (बदललेले) नाव एका इन्शुरन्स कंपनीत काम करीत होती. घरात पती आणि पाच वर्षांचा मुलगा असा तिचा संसार सुरळीत सुरू होता. मात्र, काम करीत असताना आरोपी अभय सुरेश जैस्वाल (२८) रा. राजेंद्रनगर, गल्ली नं. १७, नंदनवन झोपडपट्टी याचेशी तिची ओळख झाली. ओळखीचे प्रेमात रुपांतर झाले. दोघांनीही लग्न करण्याचा विचार केला. परंतु आरोपी अभयने तिला पतीला सोडून देण्यास सांगितले. दरम्यान तिने पतीला टाळण्यास सुरुवात केली.

पतीपासून विभक्त होऊन ती मुलासोबत राहु लागली. दरम्यान आरोपी अभयने वेळोवेळी तिचे शारिरीक शोषण केले. दिघोरी येथे एका हॉटेलमध्ये नेऊन तिच्यावर अत्याचार केला. त्यानंतर सुनिताने आरोपी अभयला लग्न करण्याबाबत दबाब टाकला. परंतु आरोपी लग्नासाठी टाळाटाळ करीत होता. तो लग्न करीत नसल्याचे पाहून सुनिताने वाठोडा पोलीस ठाणे गाठून आरोपीविरुद्ध गुन्हा दाखल केला.