दोन दिवसांपासून घराघरात कचरा

लोकमत न्यूज नेटवर्क

नागपूर : ११३ सफाई कर्मचाऱ्यांना कामावरून काढल्याने बीव्हीजी कंपनीच्या कर्मचाऱ्यांनी सलग दुसऱ्या दिवशी रविवारीही काम बंद ठेवले. यामुळे सहा झोनमधील कचरा संकलन ठप्प होते. झोन ६ ते १० मधील घराघरात कचरा साचून असल्याने नागरिक त्रस्त झाले आहेत, तर काही जण घरातील कचरा रस्त्यावर फेकत असल्याने नागरिकांच्या आरोग्याला धोका निर्माण झाला आहे. संपावर वेळीच तोडगा न काढल्यास अर्ध्या शहरात कचऱ्याची गंभीर समस्या उभी ठाकणार आहे.

प्रमुख रस्त्यावर साचलेले कचऱ्याचे ढीग मनपाच्या सफाई कर्मचाऱ्यांनी उचलले. मात्र, वस्त्यांतील व घरातील कचरा तसाच साचून आहे. नागपूर शहरातील कचरा संकलनाची जबाबदारी बीव्हीजी व एजी एन्व्हायरो या दोन कंपन्यांकडे आहे. यातील गांधीबाग, सतरंजीपुरा, लकडगंज, आसीनगर व मंगळवारी अशा झोनची जबाबदारी बीव्हीजी कंपनीकडे आहे. या कंपनीने ११३ कर्मचाऱ्यांना अचानक कामावरून कमी केल्याने कर्मचाऱ्यांनी संप पुकारला आहे. मात्र, यामुळे नागरिकांना त्रास सहन करावा लागत आहे.

मनपाच्या घनकचरा विभागाच्या अधिकाऱ्यांनी कंपनीच्या प्रतिनिधींना रविवारी चर्चेसाठी बोलावून संपावर तात्काळ तोडगा काढण्याचे निर्देश दिले; परंतु रविवारी यावर तोगडा निघू शकला नाही. तोडगा निघाला नाही तर सोमवारीही कचरा संकलन ठप्प राहण्याची शक्यता आहे.

.........

तात्काळ तोडगा काढण्याचे निर्देश

बीव्हीजी कंपनीच्या व्यवस्थापनाने ११३ कर्मचाऱ्यांना कामावरून कमी केल्याने कर्मचाऱ्यांनी संप पुकारल्याने झोन क्रमांक ६ ते १० मधील कचरा संकलन दोन दिवसांपासून ठप्प होते. मनपा कर्मचाऱ्यांकडून रस्त्यावरील कचरा उचलला जात आहे. मात्र, घराघरातील संकलन बंद आहे. यासंदर्भात बीव्हीजी कंपनीला नोटीस बजावली आहे. रविवारी चर्चेसाठी बोलावले होते. यावर तात्काळ तोडगा काढण्याचे निर्देश दिले आहेत. कंपनीने तोडगा न काढल्यास कठोर कारवाईचा इशारा दिला आहे.

डॉ. प्रदीप दासरवार, उपायुक्त (घनकचरा), मनपा