गुंडांनी केले तरुणीचे अपहरण

नागपूर : दिवसाढवळ्या एका तरुणीला धमकावून बुलेटवर बसवून जबरीने अपहरण करणाऱ्या गुंडांच्या विरोधात अंबाझरी पोलिसांनी गुन्ह्याची नोंद केली आहे. आरोपी अक्षय किशोर मडावी (२३, रा. न्यू फुटाळा) व आकाश सुरेश नेवारे (२४, रा. रामनगर, तेलंगखेडी) हे आहेत. दोघेही कुख्यात गुन्हेगार आहेत.

अक्षयच्या विरोधात आधीच खुनाचा गुन्हा दाखल आहे. २१ वर्षीय तरुणीसोबत त्याची मैत्री आहे. अक्षय गुन्हेगार असल्याने तरुणीने काही काळापासून त्याच्यापासून अंतर ठेवले होते. मंगळवारी दुपारी ती तरुणी आपल्या मैत्रिणीसोबत जात असताना फुटाळा तलावाजवळ बुलेटवर स्वार आरोपींनी तरुणीला रोखले. अक्षयने तरुणीला धाक दाखवत ‘तू माझ्याशी बोलत का नाही’ असे विचारू लागला. तरुणीने बोलण्यास नकार दिल्यावर त्याने तिला धमकावून बुलेटवर बसण्याचा आग्रह केला आणि जबरीने तिला घेऊन गेला. दरम्यान गिट्टीखदान चौकात तरुणीने विराेध करत बुलेटवरून उतरली. त्यानंतर तिने अंबाझरी पोलीस ठाण्यात तक्रार नोंदवली. अंबाझरी पोलिसांनी अपहणाचा गुन्हा नोंदवून आरोपींना अटक केली. अक्षयने तिचे अपहरण करून शहराच्या बाहेर घेऊन जाण्याची योजना आखली होती, असे सांगितले जात आहे.

...............