गुडबाय २०२०

नशेचे इंजेक्शन घेऊन विकृत बनलेल्या एका बॉडी बिल्डरने जन्मदात्या वडिलांची केलेली हत्या, माजी नगरसेवक देवा उसरे हत्याकांड, डॉक्टर महिलेने व्यसनाधीन नवरा अन् दोन निरागस चिमुकल्यांची केलेली हत्या आणि नंतर स्वत: केलेली आत्महत्या तसेच एकतर्फी प्रेमातून प्रेयसीच्या चिमुकल्या भावासह वृद्ध आजीची हत्या करून आरोपीने केलेली आत्महत्या, प्रेमप्रकरणातूनच घडलेल्या प्रतापनगर, यशोधरानगरातील हत्याकांडही थरार निर्माण करणारे ठरले.

बलात्काराचे १५२ आणि घरफोडीचे ६५८ गुन्हे घडले. लुटमार, चोऱ्या, मारामाऱ्या, प्राणघातक हल्ले या गुन्ह्यांमुळे शहरातील गुंडांची पिलावळ अजूनही वळवळत आहे आणि या पिलावळीला ठेचून काढण्याचे पोलिसांसमोर आव्हान कायम आहे, हे अधोरेखित होते. शहरात जीवघेण्या अपघाताला आळा घालण्यासाठी वाहतूक पोलिसांना अधिक सक्रिय करण्याची गरज आहे. रेती माफिया, जुगार अड्डे संचालक, जनावरांची तस्करी करणाऱ्यांवर पोलिसांनी चांगली कारवाई केली. मात्र, या धंद्यातील गब्बर बनलेल्यांना ‘बुकींसारखा’ पॉवरफुल शॉट देणे आवश्यक आहे.

---

ही कीड नष्ट व्हावी

उपराजधानीत हायप्रोफाईल सेक्स रॅकेट चालविणाऱ्यांची मोठी संख्या आहे. त्यांना ‘साथ’ देणाऱ्यांचीही संख्या मोठी आहे. त्यामुळे देश-विदेशातील वारांगनांची नागपुरात सारखी वर्दळ असते. ड्रग्ज माफियांचाही सुळसुळाट आहे. त्यांनी आपल्या मकडजालात अनेक महाविद्यालयीन तरुण-तरुणींना ओढले आहे. व्यसनाधीन करून त्यांचे जीवन बरबाद करण्याचे पाप हे समाजकंटक करीत आहेत. समाजाला लागलेली ही कीड नष्ट करण्याची गरज आहे.

----

नव्या वर्षात अपेक्षा

मावळत्या वर्षात काही ब्लॅकमेलरवर पोलिसांनी कारवाई केली. मात्र, वारंवार भेटीगाठी घेत पोलीस अधिकाऱ्यांच्या कक्षात बसून घसट वाढविणारे, नेते, वरिष्ठ पोलीस अधिकाऱ्यांना आपल्या कार्यक्रमात बोलावून सर्वसामान्यांवर इम्प्रेशन बनवणारे आणि नंतर खासगीत आपले खिसे गरम करणारे अनेक समाजकंटक शहरात सक्रिय आहेत. दोन मुखवटे घालून फिरणारे असे अनेक समाजकंटक शहरात सक्रिय आहेत. व्हाईट कॉलर गुन्हेगारांची ते पाठराखण करतात. अनेक प्रकरणात ते मांडवली करतात. पोलीस अधिकाऱ्यांचेही नाव वापरतात. अशांची कुंडली तयार झाल्यास शहरातील कोट्यवधींचे भूखंड हडपणारे भूमाफिया आणि मांडवलीखोरांना चाप बसू शकेल. मोठमोठ्या आर्थिक घोटाळ्यांमुळे नागपूरचे नाव बदनाम झाले आहे. या घोटाळेबाजांमागेही व्हाईट कॉलर समाजकंटक आहेत. यांच्या मुसक्या बांधल्यास हे घोटाळे आणि घोटाळेबाज नागपुरातून कमी होतील. आयुष्यभराची रोख अथवा जमिनीच्या रूपातील कमाई झटक्यात गिळंकृत करणाऱ्या ठगबाजांचा परिणामकारक पद्धतीने बंदोबस्त व्हावा, ही नव्या वर्षाची नागपूरकरांची पोलिसांकडून अपेक्षा आहे.

----