शाळासिद्धी व युडायसने वाढविली मुख्याध्यापकांची डोकेदुखी

नागपूर : राज्यात १ मेपर्यंत कडक लॉकडाऊन असताना शिक्षण विभागाने शाळांना शाळासिद्धी व युडायसमध्ये २६ एप्रिलपर्यंत माहिती भरण्याचे फर्मान काढले होते. शाळाच बंद असल्याने दिलेल्या मुदतीत माहिती भरणे शक्य झाले नाही.

यू-डायस प्लस ऑनलाईन प्रणालीमध्ये राज्यातील सर्व शाळांची माहिती ऑनलाईन पद्धतीने ३० मे २०२१ पर्यंत संगणकीकृत करण्याबाबतच्या सूचना देण्यात आल्या आहेत. मात्र शिक्षणाधिकाऱ्यांनी २६ एप्रिलपर्यंत शाळांनी माहिती संगणकीकृत करून देण्याचे आदेश दिल्याने, मुख्याध्यापक व शिक्षक संभ्रमात पडले आहेत. राज्यात कडक लॉकडाऊन असल्याने सर्वसामान्यांना फक्त अत्यावश्यक सेवेसाठीच बाहेर पडता येते. त्यामुळे माहिती संकलित करण्यासाठी शाळेत कसे पोहोचावे, असा प्रश्न मुख्याध्यापकांना पडला आहे. समग्र शिक्षा या योजनेचे पुढील वर्षाचे वार्षिक नियोजन व अंदाजपत्रक तयार करण्याकरिता यू-डायस प्लस प्रणालीमार्फत संगणकीकृत होणाऱ्या माहितीचा उपयोग होतोे. याच माहितीच्या आधारे भारत सरकारकडून राबविण्यात येणाऱ्या योजनांना अनुदान मंजुरी देण्यात येते. यू-डायस प्लस प्रणालीमधील माहितीचा उपयोग वार्षिक कार्ययोजना व अंदाजपत्रक तयार करण्यासाठी होतो.

शिक्षकांना घरून माहिती भरण्यास अडचण निर्माण होत असल्यामुळे शाळासिद्धी व युडायसमध्ये माहिती भरण्याला मुदतवाढ देण्याची मागणी विदर्भ प्राथमिक शिक्षक संघाचे अध्यक्ष मिलिंद वानखेडे यांनी शिक्षण आयुक्त व अप्पर शिक्षण सचिवांना केली.