नागपुरात हायप्रोफाइल सेक्स रॅकेटचा भंडाफोड

Nagpur News नागपूर पोलिसांच्या गुन्हे शाखेच्या ‘एसएसबी’ने ‘हायप्रोफाइल सेक्स रॅकेट’चा भंडाफोड केला आहे. वर्धा मार्गावरील एका हॉटेलसमोर ही कारवाई करण्यात आली.

ठळक मुद्दे दिल्ली-इंदूरच्या मुलींकडून देहव्यापार

नागपूर : नागपूर पोलिसांच्या गुन्हे शाखेच्या ‘एसएसबी’ने ‘हायप्रोफाइल सेक्स रॅकेट’चा भंडाफोड केला आहे. वर्धा मार्गावरील एका हॉटेलसमोर ही कारवाई करण्यात आली. पोलिसांनी सूत्रधार महिला व एका तरुणाला अटक केली आहे. यावेळी इंदूर व दिल्ली येथील तीन मुली आढळल्या. अश्विनी ऊर्फ स्वीटी रणजित मस्के (३७, हुडकेश्वर) आणि जुनैद ऊर्फ साहिल शेख (३५), अशी अटक करण्यात आलेल्या आरोपींची नावे आहेत.

अश्विनी ऊर्फ स्वीटी दीर्घकाळापासून देहव्यापाराचे रॅकेट चालविते व तिचे मोठे ‘नेटवर्क’ आहे. मोठ्या ग्राहकांसाठी इतर शहरातून मुली बोलावल्या जातात. त्यांना स्वतःच्या घरात ठेवून ती त्यांना हॉटेलमध्ये किंवा ग्राहकाने ठरवलेल्या ठिकाणी पाठवते. पोलिस निरीक्षक शुभांगी वानखेडे यांना स्वीटीच्या रॅकेटची माहिती मिळाली. डमी ग्राहकाच्या माध्यमातून पोलिसांनी स्वीटीसोबत एका तरुणीचा २५ हजार रुपयांना सौदा केला. वर्धा मार्गावरील रिलॅक्स इन हॉटेलसमोर स्वीटीने डमी ग्राहकाला बोलावून घेतले. तिने जुनैदला दोन मुलींसह पाठवले. तेथे पैसे घेतल्यावर मुलीला ग्राहकाला दिल्यावर लगेच धाड टाकण्यात आली.

जुनैद आणि मुलींच्या चौकशीच्या आधारे पोलिसांनी तातडीने स्वीटीच्या हुडकेश्वर येथील घरावर छापा टाकला. दरम्यान, कारवाईचा सुगावा लागल्यानंतर स्वीटीने आपल्या मुलासह फरार होण्याचा प्रयत्न केला; परंतु पोलिसांनी तिच्या घरासमोरूनच तिला ताब्यात घेतले. तिच्यासोबत आणखी एक मुलगीदेखील होती. या रॅकेटमुळे आणखी ‘लिंक्स’ समोर येण्याची शक्यता आहे.