दीक्षाभूमी ते लेह-लद्दाख आजपासून ऐतिहासिक धम्म पदयात्रा

Nagpur News बुद्धांचे धम्मचक्र गतिमान करण्याच्या उद्देशाने दीक्षाभूमी ते लेह-लद्दाखदरम्यान धम्म पदयात्रेचे आयोजन करण्यात आले आहे.

नागपूर : तथागत भगवान गौतम बुद्धांचा समता, बंधुता आणि शांतीचा संदेश जगभर पोहोचावा, तसेच डॉ. बाबासाहेब आंबेडकर यांचा भारत बौद्धमय करण्याचा संकल्प पूर्ण करण्यासाठी, बुद्धांचे धम्मचक्र गतिमान करण्याच्या उद्देशाने दीक्षाभूमी ते लेह-लद्दाखदरम्यान धम्म पदयात्रेचे आयोजन करण्यात आल्याची माहिती थायलंडचे मुख्य भन्ते पहरा थेपारीया तीसुथी व गगन मलिक यांनी रवी भवन येथे आयोजित पत्रपरिषदेत दिली.

वैशाख पौर्णिमा म्हणजेच बुद्ध जयंतीचे औचित्य साधून गगन मलिक फाउंडेशन आणि आश्रय फाउंडेशन यांच्या संयुक्त विद्यमाने पवित्र दीक्षाभूमी ते लेह-लद्दाखपर्यंत धम्म पदयात्रेला उद्या, ५ मे रोजी दीक्षाभूमी येथून सुरुवात होणार आहे. वर्धा मार्गावरील उर्वेला कॉलनी येथील डॉ. बाबासाहेब आंबेडकर सभागृह येथे दुपारी ३ वाजता श्रामणेर बनविण्याची प्रक्रिया सुरू होणार आहे. ६ ते ८ मे असे दोन दिवस सिहोरा कन्हान येथे श्रामणेर प्रशिक्षण झाल्यानंतर जवळपास १०० श्रामणेरांना राजगीर येथे नेण्यात येईल. तेथून वेणुवन आणि वेणुवन ते बुद्धगया, बुद्धगया ते धर्मशाला आणि धर्मशाला येथून धम्म पदयात्रेला सुरुवात होईल. या धम्म पदयात्रेत भारतातील १०० तर थायलंडचे १०० भन्ते सहभागी होतील. ही धम्म पदयात्रा १५ जुलै रोजी लेह-लद्दाख येथे पोहोचेल व तेथे समारोप होईल.

 

दीक्षाभूमी ते धर्मशाला दरम्यानचा श्रामणेर यांचा प्रवास हा बसद्वारे होईल, तर धर्मशाला ते लेह-लद्दाखदरम्यान एक महिन्याची धम्म पदयात्रा राहील. बुद्धगया येथे थायलंड येथील १०० भन्ते व बौद्ध धम्मगुरु पदयात्रेत सामील होतील.

भारतातून जवळपास १०० श्रामणेर बनविण्याचा गगन मलिक फाउंडेशनचा संकल्प आहे. यासाठी थायलंड येथील दहा भन्तेंचे डेलिगेशन नागपुरात दाखल झाले आहे.

पत्रपरिषदेला थायलंडचे भन्ते कंतराथाना, भन्ते रुपेश, भन्ते प्राखंती बरोम, भन्ते थियाछयो, भन्ते प्रार्थनासून, चीतिको भिकू, प्रहरा महाछाटवना यांच्यासह गगन मलिक फाउंडेशनचे नितीन गजभिये, विकास तायडे, प्रकाश कुंभे, स्मिता वाकोडे, गुणवंत सोनटक्के, वर्षा मेश्राम, रवी सवाईथुल, नरेश महाजन व गगन मलिक फाउंडेशनचे पदाधिकारी उपस्थित होते.