केंद्रीय गृहमंत्री अमित शाह, सरसंघचालक मोहन भागवत २७ एप्रिल रोजी एकाच मंचावर

तीन महिन्यांत शाह यांचा हा दुसरा नागपूर दौरा ठरणार आहे

नागपूर : केंद्रीय गृहमंत्री अमित शाह हे २७ एप्रिल रोजी एका कार्यक्रमाच्या निमित्ताने नागपूर दौऱ्यावर येणार आहेत. विशेष म्हणजे यावेळी त्यांच्यासोबत मंचावर राष्ट्रीय स्वयंसेवक संघाचे सरसंघचालक डॉ. मोहन भागवत हेदेखील उपस्थित राहण्याची दाट शक्यता आहे. जामठा येथे एका संस्थेच्या कार्यक्रमात शाह उपस्थित राहतील.

तीन महिन्यांत शाह यांचा हा दुसरा नागपूर दौरा ठरणार आहे. फेब्रुवारी महिन्यात अमित शाह हे नागपुरात आले होते. त्यावेळी त्यांनी ‘लोकमत’च्या कार्यक्रमाला हजेरी लावली होती. त्याचप्रमाणे दीक्षाभूमी व रेशीमबाग स्मृतिमंदिर परिसरालादेखील भेट दिली होती. २७ एप्रिल रोजी शाह येणार असते तरी यावेळी भाजपकडून शक्तिप्रदर्शन टाळण्यात येणार आहे. संबंधित कार्यक्रम एका संस्थेचा असून उन्हाची संभाव्य तीव्रता लक्षात घेता गर्दी टाळण्यावर भाजपचा भर राहणार असल्याची माहिती सूत्रांनी दिली.

दरम्यान, शाह नागपूर दौऱ्यावर येणार असल्याच्या वृत्ताला भाजपचे शहराध्यक्ष आ. प्रवीण दटके यांनी दुजोरा दिला आहे. भाजपकडून नेमके काय नियोजन राहणार यावर वरिष्ठांच्या सूचनेवरून पावले उचलण्यात येतील, असे त्यांनी स्पष्ट केले.