सरपंच-उपसरपंचांना मानधन, सदस्यांना मात्र केवळ चहापान

निवडणुका झालेल्या ग्रामपंचायती : १२९

निवडून आलेले सदस्य : १,१७४

सरपंच : १२२

अभय लांजेवार

उमरेड : नागपूर जिल्ह्यात जानेवारीत १२९ ग्रामपंचायतींच्या निवडणुका पार पडल्या. तीत विविध वॉर्डातून ११७४ सदस्य विजयी झाले. ११ फेब्रुवारीला अटीतटीच्या राजकारणात सरपंच-उपसरपंचसुद्धा विराजमान झालेत. आता सरपंच-उपसरपंचांना मानधन मिळणेही सुरू होईल. असे असताना जुन्याच नियमावलीचा आधार घेत ग्रामपंचायत सदस्यांना मात्र केवळ बैठक भत्ता आणि चहापानावरच समाधान मानावे लागणार आहे. आम्हीसुद्धा त्याच निवडणूक प्रक्रियेतून विजयी होतो आणि जनतेचेच प्रतिनिधी म्हणून काम करतो. असे असताना आमच्यावर ‘मानधन’स्वरूपातील अन्याय कोणत्या कारणाने, असा सवाल ग्रामपंचायतीच्या सदस्यांनी उपस्थित केला आहे.

स्थानिक स्वराज्य संस्थेत अतिशय बळकट असलेल्या आणि ‘ग्रामविकासाचा आरसा’ मानल्या जाणाऱ्या ग्रामपंचायतीमधील सदस्यांना मानधन मिळत नसल्याने आश्चर्य व्यक्त होत आहे. पाणीपुरवठा, रस्ते, दिवाबत्तीची सोय करणे, सार्वजनिक स्वच्छता, सांडपाण्याची व्यवस्था, शिक्षण, आरोग्य आदी असंख्य बाबींवर ग्रामपंचायतीचे सदस्य महत्त्वाची भूमिका वठवित असतात. त्यांच्या माध्यमातूनच सरपंच-उपसरपंच यांच्यापर्यंत ग्रामविकासाचे धोरण यथोचित पोहोचत असते. अशावेळी मानधनासाठी सदस्यांना दुर्लक्षित करणे अन्यायकारकच असल्याच्या भावना ग्रामपंचायत सदस्यांच्या आहेत. शासनाने या मुद्याबाबत विचारमंथन करून तातडीने मानधन सुरू करावे, अशी मागणी जोर धरत आहे.

सरपंच काय म्हणतात...

ग्रामपंचायत सदस्य हे ग्रामपंचायतीचा कणा आहेत. विकासकामे, बारीक सारीक बाबींवर लक्ष केंद्रित करण्यासाठी सदस्य आटापिटा करतात. खऱ्या अर्थाने त्यांनाही मानधन मिळावे, यासाठी प्रत्येक ग्रामपंचायतीने तसा ठराव पाठविण्यासाठीही पुढाकार घेतला पाहिजे.

ममता हाडके

सरपंच, शिरपूर

--

ग्रामपंचायतीच्या कारभारात सदस्यांचाही वाटा मोलाचा असतो. तेव्हा आमच्यासह त्यांनासुद्धा मानधन मिळायलाच पाहिजे.

सुनीता लांबट, सरपंच

बोरगाव लांबट

--

गावखेड्यातील प्रश्न आणि समस्या मार्गी लावण्यासाठी प्रत्येक ग्रामपंचायत सदस्य हा सोबत असतो. यामुळे त्यांना मानधन मिळणे अत्यावश्यक आहे. हा निर्णय होणे गरजेचे आहे.

गजानन शेंडे(सरपंच)

सावंगी खुर्द

मानधन ३००० ते ५०००

लोकसंख्यानिहायसरपंच मानधन उपसरपंच मानधन

ग्रामपंचायती

० ते २००० ३००० रु. १००० रु.

२००१ ते ८००० ४००० रु. १५०० रु.

८ हजाराहून जास्त ५००० रु. २००० रु.

निवडून आलेल्या सदस्यांना २०० ते ३०० रुपये बैठक भत्ता आणि चहापाणी एवढ्यावरच समाधान मानावे लागते.