अवैध देशी दारू वाहतूकदार अटकेत

लाेकमत न्यूज नेटवर्क

काेंढाळी : पाेलिसांच्या पथकाने शनिवारी (दि. ४) सकाळी ११ वाजताच्या सुमारास विकासनगर काेंढाळी, ता. काटाेल येथे केलेल्या कारवाईमध्ये देशी दारूची अवैध वाहतूक करणाऱ्या दाेघांना अटक केली. त्यांच्याकडून दारूच्या बाटल्या आणि माेटारसायकल असा एकूण ४३ हजार ४४० रुपये किमतीचा मुद्देमाल जप्त केला.

राहुल बापूराव वेताळकर (३६, रा. वडारपुरा, कोंढाळी, ता. काटाेल) व धरमसिंग प्रीतमसिंग भोंड (३२, रा. विकासनगर, कोंढाळी, ता. काटाेल) अशी अटक करण्यात आलेल्या आराेपींची नावे आहेत. काेंढाळी परिसरातून दारूची वाहतूक केली जात असल्याची माहिती मिळताच पाेलिसांनी पाहणी केली. त्यात त्यांना विकासनगरात राहुल व धरमसिंग एमएच-३१/बीई-८७४२ क्रमांकाच्या माेटारसायकलने जाताना दिसले.

संशय आल्याने पाेलिसांनी त्यांना थांबवून झडती घेतली. यात त्यांच्याकडे देशी दारूच्या १९२ बाटल्या आढळून आल्या. ती दारूची अवैध वाहतूक असल्याचे चाैकशीत स्पष्ट हाेताच पाेलिसांनी दाेघांनाही ताब्यात घेत अटक केली. त्यांच्याकडून ३० हजार रुपयांची माेटारसायकल व १३ हजार ४४० रुपये किमतीची दारू असा एकूण ४३ हजार ४४० रुपये किमतीचा मुद्देमाल जप्त केला. याप्रकरणी काेंढाळी पाेलिसांनी गुन्हा दाखल करून तपास सुरू केला आहे. ही कारवाई पाेलीस नायक प्रशांत काळे व दशरथ पवार यांनी केली.