नागपुरात तरुण, तरुणीची गळफास घेऊन आत्महत्या; प्रेमसंबंध असल्याचा संशय

आकाशने गळफास लावून आत्महत्या केल्याची माहिती मिळताच तरुणी त्याला पाहण्यासाठी त्याच्या घरी गेली. त्याचा मृतदेह पाहून ती आपल्या घरी आली व दुपट्याने गळफास लावून आत्महत्या केली.

सावनेर (नागपूर) : सावनेर शहरात धक्कादायक घटना उघडकीस आली आहे. किल्ला परिसरात एका तरुणाने गळफास घेत आत्महत्या केली. त्याला फाशी लावलेल्या अवस्थेत पाहून बाजूलाच राहणाऱ्या तरुणीने घरी जाऊन गळफास घेत स्वत:चे जीवन संपवले. या घटनेने शहरात एकच खळबळ उडाली आहे. 

सावनेरच्या माताखेडी किल्ला परिसरात आज (दि. १४) सकाळच्या सुमारास २२ वर्षीय आकाश प्रकाश लालबागे या तरुणाने घरात नायलॉनच्या दोरीने गळफास लावून आत्महत्या केली. वार्ता पसरताच हा प्रकार पाहण्यासाठी गर्दी जमू लागली. घटनेची माहीती मिळताच ठाणेदार मारुती मुळक आपल्या सहकारी कर्मचाऱ्यांसह तसेच हितज्योती फाउंडेशनचे हितेश बंन्सोड हे त्यांच्या साथीदारांसह घटनास्थळी पोहचले व मृतदेह व घटनास्थळाचा पंचनामा करुण मृतदेह शवविच्छेदन करण्यासाठी प्राथमिक आरोग्य प्रशिक्षण केंद्र सावनेर येथे रवाना केला.

वरील कारवाई सुरू असतानाच शेजारी तरुणीने ही गळफास घेतल्याची बातमी मिळाली. उपस्थितांनी तिच्या घराकडे धाव घेतली तिथे जाऊन पाहता तरुणीने दुप्पट्ट्याने  घेतल्याचे दृश्य दिसून आले. तरुणीला लगेच खाली उतरवून रुग्णालयात रवाना करण्यात आले. तिथे डॉक्टरांनी तिला मृत घोषित केले. अचानक घडलेल्या प्रकारामुळे माताखेडी परिसराचे वातावरण शोकाकुल होऊण  विविध प्रकारच्या चर्चा रंगू लागल्या आणि हे प्रकरण प्रेमप्रकरणाशी जोडल्या जाऊ लागले.

मिळालेल्या माहितीनुसार, मृतक आकाशने गळफास लावून आत्महत्या केल्याची बातमी मिळताच तरुणी त्याला पाहण्यासाठी त्याच्या घरी गेली आणि आकाशचा मृतदेह पाहून ती आपल्या घरी आली व दुपट्याने गळफास लावून आत्महत्या केली. दोन्ही घटनांची नोंद सावनेर पोलीस स्टेशनला करण्यात आली असून ठाणेदार मारुती मुळूक यांच्या मार्गदर्शनाखाली पीएसआय शिवाजी नागवे, हेकाँ. विजय पांडे पुढील तपास करत आहेत.

सध्या या घटनेला प्रेमसंबंध जोडून बघितले जात असले तरी मात्र पुढील तपासात या घटनेची सत्यता समोर येईल, असे ठाणेदार मारुती मुळूक यांनी सांगितले.