उमरेडच्या काेविड सेंटरसाठी कुहीच्या कार्यकर्त्यांची धाव

लोकमत न्यूज नेटवर्क

उमरेड : येथील नूतन आदर्श महाविद्यालयात ८० बेडचे कोविड केअर सेंटर उभारले जात आहे. विद्युत, पाणी, कुलर, गाद्या आदी संपूर्ण सुविधा याठिकाणी केल्या गेल्या. तालुका आपत्ती व्यवस्थापन समितीने नगरपालिका, ग्रामीण रुग्णालय, तालुका आरोग्य विभाग, महसूल विभागाचा चमू, तसेच सामाजिक कार्यकर्त्यांचा चमू दिमतीला लावत सद्यस्थितीत नवीन कोविड केअर सेंटर सज्ज झाले. असे असले तरी ऑक्सिजनअभावी याठिकाणच्या सेंटरचे घोडे अडले होते. अखेरीस कुही येथील एका सामाजिक कार्यकर्त्याने दिलदारपणा दाखवीत या कोविड सेंटरसाठी धाव घेतली.

साळवा (ता. कुही) येथील मातोश्री प्रभादेवी सेवा संस्थेचे संस्थापक प्रमोद घरडे यांनी स्वखर्चातून १५ जम्बो ऑक्सिजन सिलिंडर आणि तेवढ्याच ऑक्सिजन क्रोमीटरची मदत देण्यासाठी पुढाकार घेतला आहे. गुरुवारी (दि. २२) कोरोना रुग्णांसाठी लाखमोलाच्या ठरणाऱ्या या प्राणवायूचा पुरवठा केला जाणार आहे. कोविड सेंटर उभारल्यानंतर ऑक्सिजनबाबतची समस्या समोर आली होती. प्रमोद घरडे यांच्या कानावर ही बाब आनंद राऊत, नगराध्यक्ष विजयलक्ष्मी भदोरिया, नगरसेवक सतीश चौधरी यांनी घातली. घरडे यांनी लागलीच सर्वताेपरी सहकार्याचा शब्द दिला. त्यांच्या या सामाजिक दायित्त्वाचे सर्व स्तरातून कौतुक होत आहे.

तत्पूर्वी जिल्हा ग्रामीणचे जिल्हाध्यक्ष राजेंद्र मुळक यांनीसुद्धा या कोविड सेंटरला ५० बेडची मदत केली आहे. सदर कोविड केअर सेंटर तातडीने सुरू करावे, अशी मागणी दिलीप राऊत, दिलीप सोनटक्के, अश्विन उके, नागसेन निकोसे, राहुल सोनटक्के, सुरेश चिचमलकर, परसराम पिल्लेवान, महेश तवले, संजय वाघमारे, रितेश राऊत, रामेश्वर सोनटक्के, अक्षय खानोरकर, राहुल मने, क्षितिज खानोरकर, अमोल खोब्रागडे आदींनी केली आहे.

....

उमरेडमध्ये तालुका आपत्ती व्यवस्थापन समिती कोविड केअर सेंटर उभारत आहे. याकरिता ऑक्सिजनच्या पुरवठ्याची गरज असल्याचे समजताच मी यासाठी लगेच तयारी दर्शविली. केवळ ऑक्सिजनच नव्हे, तर औषधोपचारसुद्धा महत्त्वाचा आहे. मी मदत करण्यास तयार आहे.

- प्रमोद घरडे, मातोश्री प्रभादेवी संस्था, साळवा (कुही)