प्रेमविवाहानंतर संसारात कटुता; तरुणाचा पोलीस ठाण्यातच आत्महत्येचा प्रयत्न

ती तक्रार नोंदवत असताना आरोपी अनिकेत तेथे आला. त्याने तेथेही पत्नीशी वाद घातला. त्यांच्यात बाचाबाची सुरू असताना अनिकेतने स्वत:चे डोके पोलीस ठाण्यातील काचेच्या तावदानावर आपटणे सुरू केले.

ठळक मुद्देनंदनवनमधील घटना काचेच्या तावदानावर स्वत:चे डोके आपटले

लोकमत न्यूज नेटवर्क

नागपूर : घरच्यांचा विरोध झुगारून प्रेमविवाह करणाऱ्या दाम्पत्यात लग्नाच्या काही महिन्यातच कटुता आली. एकमेकांवर आरोप, अविश्वास दाखवत असल्याने त्यांच्यातील कटकटी वाढल्या. या पार्श्वभूमीवर, पत्नी पोलिसांकडे तक्रार देत असल्याचे पाहून तरुणाने पोलीस ठाण्यातील काचेच्या तावदानावर स्वत:चे डोके आपटून आत्महत्या करण्याचा प्रयत्न केला.

गुरुवारी दुपारी १२ च्या सुमारास नंदनवन पोलीस ठाण्याच्या हद्दीत ही घटना घडली. अनिकेत जगदीश बडोदे (वय २२) असे जखमी तरुणाचे नाव आहे. तो नंदनवन झोपडपट्टीत राहतो. गेल्या वर्षी त्याचे वस्तीतील एका तरुणीशी प्रेमसंबंध जुळले. काही महिन्यांपूर्वीच घरच्यांचा विरोध झुगारून या दोघांनी प्रेमविवाह केला. मात्र, आता त्यांच्यातील प्रेम ओसरू लागले आहे. एकमेकांवर संशय घेणे, आरोप लावून शिवीगाळ करण्याचे प्रकार वाढल्याने त्यांचे पटेनासे झाले आहे. यामुळे त्याची पत्नी गुरुवारी दुपारी नंदनवन ठाण्यात पोहचली.

सविता शहाजी यादव नामक महिला सहायक पोलीस निरीक्षकांकडे ती तक्रार नोंदवत असताना आरोपी अनिकेत तेथे आला. त्याने तेथेही पत्नीशी वाद घातला. त्यांच्यात बाचाबाची सुरू असताना अनिकेतने स्वत:चे डोके पोलीस ठाण्यातील काचेच्या तावदानावर आपटणे सुरू केले. त्यामुळे त्याला जबर जखमा झाल्या. पोलिसांनी त्याला वेळीच आवरल्याने संभाव्य अनर्थ टळला. पोलिसांनी अनिकेतवर उपचार करून घेतल्यानंतर त्याच्याविरुद्ध आत्महत्या करण्याचा प्रयत्न केल्याच्या आरोपाखाली गुन्हा दाखल केला.

...तिचीही धावपळ

डोळ्यादेखत पती आत्महत्येचा प्रयत्न करीत असल्याचे आणि त्यात तो गंभीर जखमी झाल्याचे पाहून त्याच्याविरुद्ध तक्रार करायला आलेल्या पत्नीचाही राग शांत झाला. तिनेही नंतर त्याच्यासाठी धावपळ सुरू केली.