हद्दच झाली! लग्न एकाशी, गर्भ दुसऱ्याचा आणि घटस्फोटाशिवाय तिसऱ्याशी संसार

Nagpur News कुणा एकाचे मूल पोटात असताना दुसऱ्यासोबत घरठाव मांडून नंतर तिसऱ्याचा हात धरून जाणाऱ्या महिलेच्या विरोधात पोलिसात तक्रार नोंदविण्यात आली आहे.

ठळक मुद्देफसवणूक करणाऱ्या महिलेविरोधात गुन्हा दाखल

नागपूर : सुंदर व संस्कार मुलीशी लग्न झाल्याने आता आयुष्य ‘सेट’ आहे असा विचार करत त्याने भविष्याची स्वप्ने रंगविली होती. मात्र लग्नाच्या काही दिवसातच ती सहा महिन्यांची गर्भवती असल्याचे समजले. हा धक्का कमी होता की काय तर १० तोळे सोन्याचे दागिने घेऊन ती माहेरी निघून गेली. यानंतर न्यायालयात दाद मागितली असता घटस्फोटाअगोदरच तिसऱ्याशी लग्न करून ती मोकळीदेखील झाली. आयुष्याच्या स्वप्नांचा चुराडा करणाऱ्या महिलेविरोधात पहिल्या पतीने तक्रार नोंदविली असून, तिच्याविरोधात गुन्हादेखील नोंदविण्यात आला आहे. एखाद्या चित्रपटाला शोभावी अशी ही घटना नागपुरात घडली आहे.

रोशन जयंत बिबे (३२, योगी अरविंद नगर) यांचे २०१५ च्या सुरुवातीला मध्य प्रदेशातील पांढुर्णा येथील सरिता काळे या तरुणीशी लग्न झाले. लग्नाच्या काही दिवसांनीच ती गर्भवती असल्याची बाब समोर आली व तिने पांढुर्णा येथीलच संजय सातपुते याच्याकडून दिवस गेल्याचे मान्य केले. रोशन व त्याची आई घरी नसताना ती १०५ ग्रॅम सोन्याचे व ५० ग्रॅम चांदीचे दागिने घेऊन माहेरी निघून गेली.

यानंतर तिने छिंदवाडा कौटुंबिक न्यायालयात खोटी तक्रार देत दाद मागितली. मात्र खटला सुरूच असताना तिने सुनील राऊत नामक व्यक्तीशी दुसरे लग्न केले. ही बाब समोर येताच रोशनने यशोधरानगर पोलीस ठाण्यात तक्रार दाखल केली. या प्रकरणात न्यायालयाच्या आदेशानुसार घटस्फोट झाला नसताना दुसरे लग्न करणे व इतर बाबींसाठी महिलेविरोधात गुन्हा दाखल करण्यात आला आहे. महिलेसोबतच नंदा काळे, प्रवीण राऊडकर, संजय सातपुते (सर्व पांढुर्णा) यांच्याविरोधातदेखील गुन्ह्याची नोंद झाली आहे.