क्रूरकर्मा पालटकर पंजाबमध्ये जेरबंद

सख्ख्या बहिणीसह तिचे अवघे कुटुंब आणि पोटच्या मुलाची अमानुष हत्या करणारा क्रूरकर्मा विवेक गुलाब पालटकर याच्या मुसक्या बांधण्यात अखेर पोलिसांना यश मिळाले. गुन्हे शाखा पोलिसांनी त्याला पंजाबमधील लुधियाना शहरातील एका झोपडपट्टीत अटक केली.

ठळक मुद्देपोलिसांनी बांधल्या मुसक्या : लुधियानात बसला होता दडून

लोकमत न्यूज नेटवर्क
नागपूर : सख्ख्या बहिणीसह तिचे अवघे कुटुंब आणि पोटच्या मुलाची अमानुष हत्या करणारा क्रूरकर्मा विवेक गुलाब पालटकर याच्या मुसक्या बांधण्यात अखेर पोलिसांना यश मिळाले. गुन्हे शाखा पोलिसांनी त्याला पंजाबमधील लुधियाना शहरातील एका झोपडपट्टीत अटक केली.
सर्वत्र थरकाप उडवून देणारे नंदनवनमधील पवनकर कुटुंबीयांचे हत्याकांड १० जूनच्या मध्यरात्रीनंतर घडले होते. सोमवारी ११ जूनला ते उघडकीस आल्यानंतर लोकमतने यासंबंधाने आजपर्यंत नवनवीन खुलासे केले आहेत.
क्रूरकर्मा पालटकरने १० जूनला रात्री बहिणीच्या घरात आराम करण्याच्या नावाखाली आश्रय मिळवला. मध्यरात्रीनंतर बहीण अर्चना, तिची मुलगी वेदांती, पती कमलाकर आणिं सासू मीराबाई पवनकरसह स्वत:चा चार वर्षीय चिमुकला कृष्णा पालटकर हे सर्व गाढ झोपेत असताना या नराधमाने त्यांची निर्घृण हत्या केली होती. ११ जूनला सोमवारी सकाळी हे हत्याकांड उघडकीस आले. हे हत्याकांड आरोपी पालटकर यानेच घडवून आणल्याचे उघड झाले. अंधश्रद्धेतून नराधम पालटकरने हे हत्याकांड घडविले आणि या हत्याकांडानंतर त्याने घेतलेल्या भाड्याच्या खोलीत रक्ताने माखलेले कपडे ठेवून विहिरीवर पहाटेच आंघोळ केली. अघोरी पूजाही मांडली. या पूजेत त्याने दही, दूध, लिंबू, बाहुली, हळद, कुुंकू, अक्षता अन् बहीण अर्चनाच्या केसाचा आणि कोंबडीच्या पिसांचा वापर केला. त्यानंतर मृतांची नावे कॅलेंडर(पोस्टर)वर लिहून ‘ते मेले’ असे लिहिले, नंतर हा नराधम फरार झाला. पोलीस त्याचा तेव्हापासून शोध घेत होते. नागपूरसह महाराष्ट्र, मध्य प्रदेश, छत्तीसगड, काश्मीर राज्यातील वेगवेगळ्या भागात पोलीस त्याला शोधत असताना तो पंजाबमध्ये दडून बसला होता. हा क्रूरकर्मा लुधियानात असल्याची माहिती गुन्हे शाखेला मंगळवारी मिळाली. त्यानंतर गुन्हे शाखेचे उपायुक्त संभाजी कदम यांनी एक पथक विमानाने लुधियानाला रवाना केले. तिकडे परिमंडळ ४ चे पोलीस उपायुक्त नीलेश भरणे यांचे पथक वैष्णोदेवी येथून सरळ लुधियानात पोहचले तर, नंदनवन पोलिसांचे तिसरे एक पथक नागपुरातुन बुधवारी निघाले, ते तेथे आज पोहचले.
ट्रकवाल्यांसोबत केली मैत्री
सूत्रांच्या माहितीनुसार, लुधियाना शहराबाहेर असलेल्या ट्रान्सपोर्ट प्लाझासारख्या परिसरात पालटकर दडून बसला होता. त्याने ट्रकवाल्यांसोबत मैत्री केली होती. बाजूच्या झोपडपट्टीत त्याने ठाण मांडले होते. ही माहिती मिळताच तीनही पोलीस पथकांनी तेथे अतिशय सावधगिरीने तपास करून क्रूरकर्मा पालटकरच्या गुरुवारी सायंकाळी मुसक्या बांधल्या. पोलिसांनी त्याला अटक केल्यानंतर नागपुरातील वरिष्ठ अधिकाऱ्यांना ही माहिती दिली. रात्री ही माहिती उपराजधानीत व्हायरल झाल्यानंतर नागपूरकरांनी समाधान व्यक्त केले.