एमआयडीसीतील हत्याकांडाची मास्टरमाइंड गजाआड

लोकमत न्यूज नेटवर्क

नागपूर : एमआयडीसी पोलीस ठाण्याच्या हद्दीत राहणाऱ्या विजयाबाई पांडुरंगजी तिवलकर (वय ६५) यांच्या हत्येचा कट रचणारी आरोपी तनू काळे हिला तिच्या प्रियकरासह गुन्हे शाखेच्या पोलिसांनी सोमवारी पहाटे अमरावतीला ताब्यात घेतले. मृत विजयाबाई यांची तनू ही नात होय.

विजयाबाई एसआरपीएफच्या निवृत्त कर्मचारी होत्या. त्यांना एक मुलगा आणि दोन मुली असून तिघांचेही लग्न झाले आहे. हे तिघेही नागपुरातच वेगवेगळ्या ठिकाणी आपल्या परिवारासह राहतात. वृद्ध विजयाबाई सप्तक नगरात एकट्या राहायच्या. त्यांच्या मुलीची मुलगी तनू स्वैर वागत होती. तिने आपल्या आईवडिलांचे घर सोडले होते. ती मित्रांसोबत राहायची. अधूनमधून आजी विजयाबाई यांच्याकडे यायची. आजी निवृत्त सरकारी कर्मचारी असल्याने तिच्याकडे १० ते १५ लाख रुपये आणि दागिने असल्याचा अंदाज तनूने बांधला होता. ती एकटीच असल्याने तिचा गेम करून रोकड तसेच दागिने लुटता येईल, आजूबाजूला सीसीटीव्ही वगैरे काही नसल्याने आपले पाप कुणाच्या लक्षात येणार नाही, असे तनूला वाटत होते. आपले अवाजवी खर्च भागविण्यासाठी आजीची हत्या करण्याचा कुविचार तिच्या मनात आला. त्यानुसार तिने प्रियकर फैजानच्या मदतीने कट रचला. त्यात फैजानचे साथीदार नीलेश प्रकाश पौनीकर, बाबा ऊर्फ कदिर खान, फरदीन खान आणि आरजू ऊर्फ मोहम्मद कमरे आलम यांना सहभागी करून घेतले. १० ते १५ लाख रुपये मिळणार म्हणून आरोपी त्यात सहभागी झाले आणि गुरुवारी मध्यरात्री त्यांनी विजयाबाईच्या गळ्यावर गुप्तीचे घाव घालून त्यांची हत्या केली. पोलिसांनी शनिवारी रात्री बाबा, नीलेश पौनिकर आणि फरदीन खान तसेच आरजूला पकडले. तर रोकड, दागिन्यांसह पळून गेलेल्या तनू आणि तिचा प्रियकर फैजान यांना अमरावतीला सोमवारी पहाटे ताब्यात घेतले.

---