बहुतेक सदाभाऊंच्या **** आग लागली असावी, शरद पवारांवरील टीकेनंतर मिटकरींचे प्रत्युत्तर

आग लावण्याच काम भाजपच करत आहे. भाजपपासून महाराष्ट्राला धोका निर्माण झालेला आहे. जनतेला हे माहित आहे. सदाभाऊ खोत यांच्या बोलण्याला भाजपमध्येही कोणी महत्त्व देत नाही, अशी टीकाही मिटकरी यांनी केली.

नागपूर : रयत क्रांती संघटनेचे अध्यक्ष सदाभाऊ खोत यांना प्रत्युत्तर दिले. सदाभाऊ खोत यांनी राष्ट्रवादी काँग्रेसचे प्रमुख शरद पवार यांच्यावर टीका करत ते महान नेते आहे, त्यांनी राज्यामध्ये काड्या करण्यापलीकडे कांही केलं नाही, असे म्हटले होते. यावर राष्ट्रवादीचे आमदार अमोल मिटकरी खोत यांच्यावर जोरदार हल्लाबोल केला आहे. 

सूर्याकडे पाहून थुंकण्याचा प्रयत्न केला तर आपल्याच तोंडावर थुंकी उडते, एवढं ज्ञानही सदाभाऊंना नाही, सदाभाऊ खोत यांची आमदारकीची टर्म संपलेली आहे. पुढील आमदारकी भेटावी यासाठी त्यांची धडपड सुरू आहे. बहुतेक त्यामुळे सदाभाऊंच्या **** आग लागली असावी, अशी विखारी टीका मिटकरींनी केली.

हे सदाभाऊ बोलत नाही, तर यांचे मास्टरमाईंड देवेंद्र फडणवीस आहेत, असं माझं स्पष्ट मत असल्याचेही मिटकरी म्हणाले. आग लावण्याच काम भाजपच करत आहे. भाजपपासून महाराष्ट्राला धोका निर्माण झाला असून जनतेलाही हे माहित आहे. सदाभाऊ खोत यांच्या बोलण्याला भाजपमध्येही कोणी महत्त्व देत नाही, अशी टीकाही मिटकरी यांनी केली.

काय आहे प्रकरण

सांगलीतील पुण्यश्लोक अहिल्यादेवी होळकर स्मारक लोकार्पण सोहळ्यासंबंधी बोलताना सदभाऊंनी शरद पवारांवर तोफ डागली. शरद पवारांनी जाईल तिथं आग लावायची आणि दुसऱ्या घराला परत आग लावायला निघून जायचं. त्यांचं सर्व आयुष्य हे आग लावण्यामध्येच गेलं आहे. त्यामुळे त्यांनी पवार हे आडनाव बदलून 'आगलावे' करावं, अशी टीका त्यांनी केली होती.