मोबाईल व वाहनचोरी करणारा अटकेत

नागपूर : दार उघडे ठेवून झोपलेल्या व्यक्तीच्या घरातील तीन मोबाइल चोरी करणाऱ्या आरोपीला पाचपावली पोलिसांनी अटक करून त्याच्याकडून चोरी केलेले तीनही मोबाइल जप्त केले आहेत, तसेच सदर ठाण्याच्या हद्दीतून चोरी केलेला एक ऑटोही जप्त केला आहे.

अमित घनश्याम गुरबेले (२५) रा. संघशील बौद्ध विहाराजवळ, विदर्भ हाऊसिंग सोसायटी, बाळाभाऊपेठ हे २७ ऑगस्टला रात्री १० वाजता आपल्या घराचे दार उघडे ठेवून झोपले होते. त्यांचा व त्यांच्या मित्रांचे २९९९० रुपये किमतीचे तीन मोबाइल घरात ठेवलेले होते. त्यांच्या झोपेचा फायदा घेऊन अज्ञात आरोपीने तीनही मोबाइल पळविले. याबाबत त्यांनी पाचपावली पोलिसात तक्रार दिली होती. दरम्यान, मिळालेल्या गुप्त माहितीच्या आधारे पाचपावली पोलिसांनी आरोपी अभिमन्यु गेंदलाल चौहान (२०) रा. बेलिशॉप क्वार्टर, साई मंदिराजवळ, पाचपावली यास ताब्यात घेतले. त्याची सखोल चौकशी केली असता त्याने तीनही मोबाइल चोरी केल्याची कबुली दिली. त्याच्याकडून चोरी केलेले मोबाइल ताब्यात घेण्यात आले. आरोपीची अधिक चौकशी केली असता त्याने सदर ठाण्याच्या हद्दीतील ऑटो क्रमांक एम. एच. ३१, ई. पी-१६६५ किंमत एक लाख रुपये चोरी केल्याचे सांगितले. त्यामुळे त्याच्याकडून ऑटोही जप्त करण्यात आला. ही कारवाई वरिष्ठ पोलीस निरीक्षक संजय मेंढे, पोलीस निरीक्षक रवि नागोसे, सहायक पोलीस निरीक्षक चंद्रकांत कोसे, हवालदार विजय यादव, वासुदेव जयपूरकर, अंकुश राठोड, गणेश ठाकरे, आशिष बावनकर, विलास चव्हाण, नितीन लोखंडे यांनी पार पाडली.

..............