भर रस्त्यात छेड काढून विद्यार्थिनीला झापड मारली; सडकछाप मजनू कोठडीत

Nagpur News रस्त्याने जात असलेल्या एका विद्यार्थिनीला दुचाकीचा जाणीवपूर्वक हॅण्डल (कट) मारून दोन सडकछाप मजनूंनी तिची छेड काढली. विद्यार्थिनीने विरोध करून जाब विचारला असता आरोपीने तिला झापड मारली.

 

नागपूर : रस्त्याने जात असलेल्या एका विद्यार्थिनीला दुचाकीचा जाणीवपूर्वक हॅण्डल (कट) मारून दोन सडकछाप मजनूंनी तिची छेड काढली. विद्यार्थिनीने विरोध करून जाब विचारला असता आरोपीने तिला झापड मारली. भारत माता चाैकातील जागृतेश्वर मंदिराजवळ सोमवारी रात्री ९.३० च्या सुमारास ही घटना घडली.

१६ वर्षीय विद्यार्थिनी तिच्या एका मैत्रिणीसह रस्त्याने पायी जात होती. आरोपी राजेश सुंदरलाल ढोके (वय ४४, रा. जागनाथ बुधवारी, कुंभारपुरा) आणि चंदू विठ्ठलराव लारोकर (वय ३८, रा. तीननल चाैक) हे दोघे दुचाकीने आले. त्यांनी पीडित विद्यार्थिनीला जाणीवपूर्वक दुचाकीचा हॅण्डल (कट) मारला. त्यामुळे विद्यार्थिनीने आरोपीला विरोध करून जाब विचारला. त्यावर निर्ढावलेल्या ढोके आणि लारोकरने आपल्या मुलीच्या वयाच्या या विद्यार्थिनीशी लज्जास्पद वर्तन करून तिला झापड मारली. या प्रकारामुळे आजूबाजूची मंडळी गोळा झाली. वातावरण गरम झाले असतानाच गस्तीवर असलेले बिट मार्शला तेथे पोहोचले. त्यांनी विद्यार्थिनींची विचारपूस करून आरोपींना ताब्यात घेतले. त्यांना तहसील पोलीस ठाण्यात आणले. ठाणेदार जयेश भांडारकर यांनी पीडित विद्यार्थिनींना धीर दिला. त्यांच्या पालकांशी संपर्क केला. त्यानंतर पीडित विद्यार्थिनीची तक्रार नोंदवून घेत आरोपी ढोके आणि लारोकरला अटक केली.

----