म्युकरमायकोसिस टास्क फोर्स समितीची कार्यकक्षा वाढली ()

तज्ज्ञ डॉक्टरांकडून आजारावर विचारमंथन

उपचारासाठी प्रमाणित कार्यपद्धत (एसओपी )

लोकमत न्यूज नेटवर्क

नागपूर : उच्च न्यायालयाच्या निर्देशानंतर विभागीय आयुक्त, जिल्हाधिकारी व महानगरपालिका आयुक्त यांच्या सूचनेवरून म्युकरमायकोसिसच्या विस्तारित टास्क फोर्सची बैठक शनिवारी जिल्हाधिकारी कार्यालयात पार पडली. शहरातील रुग्णांची संख्या, उपचाराची पद्धत, जनजागृती आणि आजारावर नियंत्रण आणण्याबाबत या बैठकीत विचारमंथन झाले. जिल्हाधिकारी कार्यालयामध्ये दुपारी २ वाजता उच्च न्यायालयाच्या निर्णयानंतर यापूर्वीच्या १३ सदस्यीय समितीला २२ सदस्यीय समिती, असे विस्तारित स्वरूप देण्यात आले.

या बैठकीमध्ये म्युकरमायकोसिस व अन्य बुरशीजन्य आजाराबद्दल तज्ज्ञांची चर्चा झाली. या चर्चेमध्ये सोमवारपर्यंत उपचार करणाऱ्या सर्व हॉस्पिटलकडून माहिती गोळा केली जाणार आहे. तसेच यासंदर्भात उपचाराची प्रमाणित कार्यपद्धती (एसओपी) तयार करण्यासाठीही एक उपसमिती करण्यात आली. शहरातील उपचार करणाऱ्या हॉस्पिटलचे सर्वेक्षण करण्यासाठीही एक समिती तयार करण्यात आली. सर्व हॉस्पिटलकडून सध्या माहिती गोळा करण्यात येणार आहे. सोबतच आजाराच्या जनजागृतीसाठी मोहीम आखण्याचेसुद्धा निर्देशित करण्यात आले.

बैठकीला जिल्हाधिकारी रवींद्र ठाकरे, जिल्हा शल्य चिकित्सक डॉ. देवेंद्र पातूरकर, टास्क फोर्सचे अध्यक्ष डॉ. प्रशांत निखाडे, डॉ. मिलिंद भ्रृशंडी, डॉ. आशिष थूल, डॉ. गिरीश भुतडा, डॉ. रामक्रिष्णा शिनॉय, डॉ. अरविंद सरनाईक, डॉ. बिपीन देहाने, डॉ. मिलिंद चांगोले, डॉ. श्याम बाभुळकर, डॉ. दिनेश अग्रवाल, डॉ. उदय नार्लावार, डॉ. रवींद्र खडसे, डॉ. मीना मिश्रा, डॉ. नितीन शिंदे, डॉ. अश्विनी तायडे, डॉ. कमल भुतडा, डॉ. संजय चिलकर, डॉ. वर्षा देवस्थळे, रिता जॉन, डॉ. हर्षा मेश्राम, डॉ. नितीन गुल्हाने, डॉ. दिनेश अग्रवाल, डॉ. तेजस्विनी गेडाम, डॉ. विनोद पाखधुने, डॉ. पुरवली काटकर, डॉ. दीपिका साखरे, सोनल रोडे आदी उपस्थित होते.