नागपुरात दिवसाढवळ्या भाईगिरी; चाकूच्या धाकावर कॅफेमालकाचे अपहरण करत मारहाण

या प्रकारामुळे परिसरात खळबळ उडाली आहे.

नागपूर : उपराजधानीत गुंडांवर कुठलाही वचक राहिलेला नसून अगदी दिवसाढवळ्या भर रस्त्यावरदेखील राडा करण्यास मागेपुढे पाहत नाहीत. राणाप्रतापनगर पोलीस ठाण्याच्या हद्दीत एका मुलीशी बोलण्याच्या शुल्लक मुद्द्यावरून आठ गुंडांनी चाकूच्या धाकावर एका कॅफेमालकाचे भर दिवसा अपहरण केले. त्यानंतर त्याला निर्जन जागी नेत बेदम मारहाण केली. या प्रकारामुळे परिसरात खळबळ उडाली आहे.

संतोष नरेश जोगेकर (२५) असे तक्रारदाराचे नाव आहे. हिंगणा टी पॉईंट परिसरात त्याचा कॅफे आहे. सोमवारी दुपारी साडेतीन वाजताच्या सुमारास तो कॅफेमध्येच असताना तीन तरुण आले. अगोदर त्यांनी बर्थडे पार्टीसाठी कॅफे हवा आहे अशी विचारणा केली व त्यानंतर तोंडावर रुमाल बांधून एक तरुण आला व संतोषला त्याचे नाव विचारले. त्यानंतर अचानक चौघांनीही शिवीगाळ करत संतोषला मारहाण सुरू केली. तरुणाने रुमाल काढला तेव्हा तो हर्षल ब्राह्मणे (२५, दाते ले आऊट) असल्याचे संतोषने ओळखले. हर्षलने खिशातून चाकू काढत त्या धाकावर संतोषला फरफटत कॅफेबाहेर आणले. त्याच्या हातात चाकू असल्याने इतर कुणी वाचवायला समोर आले नाही. हर्षलचे आणखी पाच साथीदार बाहेर उभे होते. आरोपींनी संतोषला जबरदस्तीने मोटारसायकलवर बसविले व अजनी रेल्वे कॉलनीजवळील मैदानावर नेले. तेथे एका मुलीला किती वेळा भेटलास अशी विचारणा हर्षलने केली. यानंतर हर्षलने परत संतोषला मारहाण केली. सायंकाळी दोन आरोपींनी मोटारसायकलवरच संतोषला परत कॅफेजवळ सोडले. या प्रकारामुळे संतोष हादरला. त्याने राणाप्रतापनगर पोलीस ठाण्यात तक्रार केली. पोलिसांनी हर्षल व त्याच्या सात साथीदारांविरोधात गुन्हा दाखल केला आहे.