धक्कादायक ! मित्रासोबत फिरायला गेलेल्या तरुणीवर सामूहिक बलात्कार

नागपुरातील एमआयडीसी पोलीस ठाण्याच्या हद्दीत एका तरुणीवर सामूहिक बलात्कार झाल्याची घटना उघडकीस आली आहे. याप्रकरणी पोलिसांनी कारवाई करत एका आरोपीस अटकेत घेतले आहे.

ठळक मुद्देएक आरोपी अटकेत

नागपूर : मित्रासोबत फिरायला गेलेल्या एका तरुणीवर सामूहिक बलात्कार झाल्याची घटना उघडकीस आली आहे. ही घटना माधव नागरी भागात एमआयडीसी पोलीस (Nagpur MIDC Police) ठाण्याच्या हद्दीत घडली आहे. याप्रकरणी पोलिसांनी तत्काळ कारवाई करत एका आरोपीला बेड्या ठोकल्या

माहितीनुसार, नागपुरातील एमआयडीसी पोलीस (Nagpur MIDC Police) ठाण्याच्या हद्दीत पीडित मुलगी ही आपल्या मित्रासोबत रस्त्यावर उभी होती. दरम्यान तेथे चार तरुण आले आणि त्यांनी पीडित मुलीसोबतच्या मुलाला मारहाण करण्यास सुरुवात केली. या तरुणाला मारहाण करुन आरोपींनी पीडित मुलीला शेजारील शिवारात नेलं आणि तिच्यावर सामूहिक बलात्कार केला. या प्रकरणी पोलिसांत तक्रार दाखल करण्यात आली आहे.

तक्रार दाखल होताच पोलिसांनी तातडीने आपली सूत्रे हलवली आणि आपला तपास सुरू केला. या प्रकरणातील एका आरोपीला पोलिसांनी अटक केली आहे. तर इतर तीन आरोपी अद्यापही फरार आहेत. फरार असलेल्या तिन्ही आरोपींचा पोलिसांकडून शोध सुरू आहे.

नागपुरात यापूर्वीही अशा प्रकारच्या घटना उघडकीस आल्या आहेत. नुकतंच नागपुरात एमबीएचं शिक्षण घेणाऱ्या एका तरुणीवर लग्नाचं आमिष दाखवून वारंवार अत्याचार केल्याची धक्कादायक घटना काही दिवसांपूर्वी समोर आली होती. तर, आता ही घटना समोर आली असून नागपुरात महिला सुरक्षेचा प्रश्न पुन्हा एकदा ऐरणीवर आला आहे.