नवोदय बँकेच्या मुख्यालयात गुन्हे शाखेची धडक : ३९ कोटींचा घोटाळा

नियमांना तिलांजली देत अनेकांना कोट्यवधींचे कर्ज वाटून ३९ कोटींचा घोटाळा झालेल्या नवोदय बँकेच्या मुख्यालयात गुरुवारी गुन्हे शाखेचे पथक धडकले. या पथकाने घोटाळ्याच्या चौकशीसोबतच ११५ प्रकरणांची कागदपत्रे ताब्यात घेण्याची प्रक्रिया सुरू केल्याने बँकेचे अध्यक्ष अशोक धवड, त्यांची पत्नी किरण धवड तसेच संबंधित संचालकांच्या अडचणी वाढल्या आहेत. दुसरीकडे पोलिसांनी कारवाईचा पवित्रा घेतल्याने संबंधित वर्तुळातही प्रचंड खळबळ निर्माण झाली आहे.

ठळक मुद्दे कागदपत्रे ताब्यात घेण्याची प्रक्रिया सुरू : बँकिंग क्षेत्रात खळबळ

लोकमत न्यूज नेटवर्क
नागपूर : नियमांना तिलांजली देत अनेकांना कोट्यवधींचे कर्ज वाटून ३९ कोटींचा घोटाळा झालेल्या नवोदय बँकेच्या मुख्यालयात गुरुवारी गुन्हे शाखेचे पथक धडकले. या पथकाने घोटाळ्याच्या चौकशीसोबतच ११५ प्रकरणांची कागदपत्रे ताब्यात घेण्याची प्रक्रिया सुरू केल्याने बँकेचे अध्यक्ष अशोक धवड, त्यांची पत्नी किरण धवड तसेच संबंधित संचालकांच्या अडचणी वाढल्या आहेत. दुसरीकडे पोलिसांनी कारवाईचा पवित्रा घेतल्याने संबंधित वर्तुळातही प्रचंड खळबळ निर्माण झाली आहे.
गुन्हे शाखेच्या आर्थिक विभागाने बुधवारी, १५ मे रोजी बँकेचे पदाधिकारी, संचालक मंडळ, अधिकारी तसेच कर्जदारांच्या विरुद्ध फसवणूक, कटकारस्थान, गुन्हेगारी षड्यंत्र रचल्याच्या आरोपावरून एमपीआयडी तसेच आयटी अ‍ॅक्टनुसार गुन्हा दाखल केला. पदाचा दुरुपयोग करून बँकेच्या संचालक मंडळाने नियमांचे उल्लंघन करून एकाच व्यक्तीला वारंवार कर्ज दिले. थकीत कर्जदाराचे तारण असलेली मालमत्ता तसेच कागदपत्रे परत केली. अनेक बनावट कर्जदारांना लाखोंचे कर्ज वाटले. वादग्रस्त मालमत्तेला तारण ठेवून बँकेचे लाखोंचे नुकसान केले. रिझर्व्ह बँकेकडून आर्थिक प्रतिबंध लावले असूनदेखिल बँकेच्या कॉम्प्युटरमध्ये बनावट नोंदी करत २०१० ते २०१७ या कालावधीत बँकेला ३९ कोटींचा चुना लावण्यात आला. लेखा परीक्षक श्रीकांत सुपे यांनी केलेल्या चौकशीत ३८ कोटी, ७५ लाख, २० हजार, ६४१ रुपयांचा गोलमाल झाल्याचा अहवाल मिळाल्याने पोलिसांनी या प्रकरणी बुधवारी बँकेच्या संचालकांवर गुन्हे दाखल केले.
लेखा परीक्षण अहवालात २५ जणांवर ठपका
काँग्रेसचे माजी आमदार अशोक धवड वर्ष २०१० पासून बँकेचे अध्यक्ष आहेत. घोटाळ्यात त्यांचा सर्वाधिक सहभाग आहे. कोट्यवधींच्या आर्थिक घोटाळ्यात अशोक धवड आणि त्यांची पत्नी किरण धवड, चुलत भाऊ मधुकर धवड यांच्यासह उपाध्यक्ष कृष्णराव निरुळकर, संचालक नाना देवलकर, विजय बाभरे, अरविंद धवड, देवराव मेश्राम, प्रमोद डाखोळे, राजेंद्र पिंपळकर, अरुण पाटील, दिलीपकुमार अग्रवाल, ताराचंद चरडे, सतीश हरडे, प्रभाकर धानोरकर, शिवराम गुरनुले, रोशनी कलमकार, जी. बालसुब्रमण्यम, तज्ज्ञ संचालक प्रवीण राऊत, माजी मुख्य कार्यकारी अधिकारी समीर चट्टे, मुख्य कार्यकारी अधिकारी संजय नाईक, माजी व्यवस्थापक राजेश बांते, कर्मचारी तारकेश्वर ठाकरे व राजेश बोगुल, शाखाधिकारी अशोक पिंपळाघरे यांचा सक्रिय सहभाग असल्याचे वैधानिक लेखा परीक्षण अहवालात नमूद केले आहे.
चार वर्षांपूर्वीच तक्रार
बँकेतील आर्थिक अफरातफरीची तक्रार गुन्हे शाखेच्या आर्थिक विभागाला २०१५ मध्येच प्राप्त झाली होती. तत्कालीन एसआयटीकडे हे प्रकरण गेले होते. मात्र, कारवाईच्या नावाखाली टाइमपास झाला. बुधवारी गुन्हा दाखल होताच आर्थिक शाखा सक्रिय झाली. वरिष्ठांच्या आदेशानुसार, तपास पथकाने बँकेच्या धंतोलीतील सिल्व्हर पॅलेसमधील मुख्यालयात धडक दिली. घोटाळ्याशी संबंधितांना विचारपूस करून दस्तावेज ताब्यात घेण्यात आले. बँकेने ४० जणांचे ११५ कर्ज आवेदन मंजूर केले. या प्रकरणात नियमांना तिलांजली देत बँकेला ३९ कोटींचा फटका देण्यात आला.
बचावासाठी धावपळ वाढली
प्रकरणाची व्याप्ती लक्षात घेता कागदपत्रे, कॉम्प्युटर तसेच अन्य दस्तावेजांची छाननी, तपासणी आणि जप्ती प्रक्रियेला दोन ते तीन दिवस लागू शकतात. दस्तावेज जप्त केल्यानंतर पोलीस या घोटाळ्याशी संबंधित आरोपींकडे चौकशी करणार आहेत. यात बँकेचे पदाधिकारी, संचालक मंडळ, अधिकारी कर्जदारांसह ८० पेक्षा जास्त जणांचा समावेश आहे. गुन्हा दाखल झाल्यानंतर पोलिसांची सक्रियता लक्षात घेत आरोपींनी आपल्या बचावासाठी धावपळ वाढवली आहे. बचावासाठी काही आरोपी आजारपणाचे कागदपत्र बनविण्यातही गुंतल्याचे सांगितले जाते.