पत्नीला भेटायला आलेल्या तरुणावर शेजाऱ्याचा हल्ला

तोडफोडही केली : वाठोड्यात गुन्हा दाखल

लोकमत न्यूज नेटवर्क

नागपूर : भावी पत्नीला भेटण्यासाठी आलेल्या तरुणाशी वाद घालून एका आरोपीने त्याला गंभीर जखमी केले. वाठोडा पोलीस ठाण्याच्या हद्दीत गुलशननगरात सोमवारी सायंकाळी ही घटना घडली. जीशान शकील खान (वय १९) असे जखमी तरुणाचे नाव आहे. जिशान कलमण्याच्या गुलमोहोरनगरात राहतो. खरबी, वाठोड्यातील गुलशननगरात एका तरुणीशी त्याचे लग्न जुळले आहे. भावी पत्नीला भेटण्यासाठी जिशान सोमवारी सायंकाळी ५च्या सुमारास गुलशननगरात आला. त्याला पाहून बाजूला राहणारा आरोपी साजिद खान याने जिशानसोबत वाद घातला. त्याच्यावर लोखंडी आरीने हल्ला चढविला. या हल्ल्यात जिशान रक्तबंबाळ झाल्यानंतर, आरोपीने त्याच्या ऑटोतील लाकडी दांडा काढून जिशानला बेदम मारहाण केली. एवढेच नव्हे, तर जिशानच्या सासूच्या घराचे टीनाचे कंपाउंड तोडून आरोपी साजिद खान यांनी नुकसान केले. आजूबाजूची मंडळी धावली आणि त्यांनी आरोपी साजिदला आवरले. जखमी जिशानला उपचार करून घेतल्यानंतर, वाठोडा पोलीस ठाण्यात तक्रार नोंदविली. पोलिसांनी आरोपी साजिद विरुद्ध विविध कलमांनुसार गुन्हा दाखल केला. पुढील चौकशी सुरू आहे.

---