डोस नसल्याचे कारण करून १८ वर्षांवरील लसीकरण नाही

नागपूर शहरात यक्त ११२३१ जणांचे लसीकरण

लोकमत न्यूज नेटवर्क

नागपूर : कोरोना संक्रमणामुळे काही महिन्यांपूवीं भीतीचे वातावरण असलेल्या नागपूर शहरात सोमवारी फक्त ११२३१ लोकांना डोस देण्यात आले. दुसरीकडे देशभरात १८ वर्षावरील सर्वांचे लसीकरण सुरू झाले आहे; परंतु नागपुरात लस पुरेशा प्रमाणात उपलब्ध नसल्याचे कारण पुढे करून १८ वर्षावरील लसीकरण सुरू करण्यात आलेले नाही. राज्य सरकारच्या आदेशानंतर शनिवारी ३० ते ४४ वयोगटाचा नवीन ग्रुप तयार करून लसीकरणाला सुरुवात करण्यात आली. यावरून नागपूर शहरातील नागरिकांचा खेळखंडोबा सुरू आहे. दरम्यान, मंगळवारपासून १८ वर्षावरील नागरिकांचे लसीकरण होणार असल्याची माहिती आहे.

मध्यप्रदेशातील इंदूर शहरात सोमवारी एकाच दिवशी २.१२ लाख डोस देण्यात आले; परंतु नागपुरात डोस उपलब्ध नसल्याचे सांगत फक्त ११ हजारांच्या आसपास डोस देण्यात आले. लसीकरणाशिवाय कोरोना संक्रमणावर मात करणे शक्य नाही. नागपूर शहराची लोकसंख्या ३० लाखांच्या आसपास आहे. परंतु यातील ५.६१ लाख लोकांनाच पहिला डोस देण्यात आला आहे. तर १लाख ८८ हजार ८९८ लोकांना दुसरा डोस देण्यात आला आहे. सोमवारी नागपुरात एकूण ११२३१ डोस पैकी ८३९६ डोस ३० ते ४४ वयोगटातील नागरिकांना देण्यात आले. दुसरीकडे नागपूर ग्रामीणमध्ये एकूण ९१९३ डोस देण्यात आले. यात ३० ते ४४ वयोगटातील ६७८३ नागरिकांचा समावेश आहे.

विशेष म्हणजे १८ ते ४४ वयोगटाचा समूह केंद्र सरकारने तयार केला आहे; परंतु राज्य सरकारने ३० ते ४४ वयोगटाचा नवीन समूह तयार केला आहे. गेल्या तीन दिवसात या वयोगटातील २५०९१ लाभार्थीचे लसीकरण करण्यात आले. शहरातील १०५ केंद्रावर लसीकरण सुरू आहे. परंतु नागरिकांची संखया विचारात घेता केंद्रांची संखया वाढविण्याची गरज आहे. शहराची ३० लाख लोकसंखया विचारात घेता २० जूनपर्यंत १८.७० टक्के लोकांनाच डोस देण्यात आला. हा वेग फार कमी आहे. लसीचे डोस उपलब्ध करून केंद्रांची संख्या वाढवावी लागेल अन्यथा शहरात कोरोनाची तिसरी लाट आल्याशिवाय राहणार नाही. यातून सावरणे कठीण होईल.

.....

आज सुरू होणार १८ वर्षावरील लसीकरण: आयुक्त

राज्य सरकारच्या निर्देशानुसार ३० ते ४४ वयोगटातील नागरिकांचे लसीकरण शनिवारपासून सुरू करण्यात आले आहे. १८ वर्षावरील सर्वांना मंगळवार पासून लस दिली जाणार असल्याची माहिती मनपा आयुक्त राधाकृष्णन बी. यांनी दिली. मनपाकडे ४० ते ४५ हजार डोस उपलब्ध आहेत. उपलब्धतेनुसार लसीकरण सुरू आहे. सरकारकडून मिळणाऱ्या निर्देशानुसार लसीकरण होत आहे. शहरात १०५ केंद्रावर लसीकरण सुरू असल्याचे आयुक्तांनी सांगितले.