रस्त्यांची चाळण अन् अधिकारी म्हणतात, फक्त ३,३६० खड्डे!

शहरातील रस्त्यांवरील ५,४६५ खड्डे बुजविल्याचा दावा : इन्स्ट्रा मशीन खरेदी करणार

लोकमत न्यूज नेटवर्क

नागपूर : शहरातील रस्त्यांची चाळण झाली आहे. सर्वच भागातील डांबरी रस्त्यावर लहान-मोठे खड्डे पडल्याने नागरिक त्रस्त आहेत. दुसरीकडे महापालिकेच्या झोन अधिकाऱ्यांच्या दाव्यानुसार शहरात फक्त ३,६६० खड्डे शिल्लक आहेत.

पावसाळा आला की शहरातील रस्त्यावर जागोजागी खड्डे पडतात. हा दरवर्षीचा अनुभव आहे. पावसाळ्याच्या दिवसात मनपाचा हॉटमिक्स प्लांट बंद राहत असल्याने जेट पॅचर व रोड इन्स्ट्रा पॅचर मशीनचा वापर करून खड्डे बुजविले जातात. बुधवारी स्थायी समितीच्या बैठकीत रोड इन्स्ट्रा पॅचरद्वारे शहरातील खड्डे बुजविण्याच्या १ कोटी ९८ लाख ९५ हजार ४९५ रुपयाच्या खर्चाला मंजुरी देण्यात आली. ९०० रुपये प्रति चौरस मीटरप्रमाणे खड्डे बुजविले जाणार आहे.

शहरातील अजनी रेल्वे पुलावरील खड्डे चार दिवसापूर्वी बुजवण्यात आले. यातील गिट्टी पुन्हा बाहेर पडली आहे. बोर्ड ऑफीस चौकाकडून संविधान चौकाकडे तसेच आकाशवाणी चौकाकडे जाणाऱ्या रस्त्यावर जागोजागी खड्डे आहेत. अंबाझरी, एलएडी चौक, लेडीज क्लब चौक, सिव्हिल लाईन्स, बेसा, आदिवासी गोवारी पुलाखालील रस्ता, झिंगाबाई टाकळी, देवनगर, खामला चौक यासह शहरातील बहुसंख्य रस्त्यांची स्थिती विदारक आहे.

...

५,४६५ खड्डे बुजविल्याचा दावा खरा की खोटा?

हॉटमिक्स विभागाने शहरातील ५,४६५ खड्डे बुजविल्याचा दावा केला आहे. दुसरीकडे शहरातील सर्वच डांबरी रस्त्यावर खड्डे कायम असल्याने विभागाचा दावा खरा की खोटा, असा प्रश्न शहरातील नागरिकांना पडला आहे.

.....

अपघाताचा धोका वाढला

पावसामुळे खड्डे पाण्याने भरले आहेत. ते लक्षात येत नसल्याने वाहनांचा अपघात होण्याच्या घटना वाढल्या आहेत. महापालिकेने ५,४६५ खड्डे बुजविल्याचा दावा केला असला तरी, झालेल्या कामाबाबतही प्रश्नचिन्ह आहे. काही दिवसातच बुजविलेल्या खड्ड्यातील गिट्टी बाहेर पडते. परंतु कंत्राटदाराला जाब न विचारता कोट्यवधीचे बिल दिले जाते.

...

-शहरातील एकूण रस्त्यांची लांबी २,३१३.६५ किलोमीटर

- डांबरी रस्ते १,४९१.१९ किलोमीटर

- सिमेंटचे रस्ते ७०० किलोमीटर

- कच्चे रस्ते १५० किलोमीटर