विद्युत लाईनने घेतला जीव

सुगतनगर येथील आरमोर रो-हाऊसच्या छतापासून झाडावर अडकलेल्या बॉलला काढण्याच्या प्रयत्नात

सुगतनगरातील घटना : एकापाठोपाठ दुसऱ्या भावाचाही मृत्यू
लोकमत न्यूज नेटवर्क
नागपूर : सुगतनगर येथील आरमोर रो-हाऊसच्या छतापासून झाडावर अडकलेल्या बॉलला काढण्याच्या प्रयत्नात उच्चदाबाच्या विद्युत लाईनचा धक्का बसलेला दुसरा जुळा भाऊ पीयूष संजय धर याचा मंगळवारी उपचारादरम्यान मृत्यू झाला. या घटनेने धर कुटुंबावर दु:खाची कुऱ्हाड कोसळली.
३१ मे रोजी संजय धर यांची प्रियांश व पीयूष धर ही दोन्ही जुळी मुले घराच्या छतावर खेळत होती. घराच्या जवळून उच्चदाबाची विद्युत लाईन गेली आहे. खेळताना बॉल झाडावर अडकला. तो काढण्याच्या प्रयत्नात असतानाच दोन्ही मुले उच्चदाबाच्या विद्युत लाईनचा संपर्कात येऊन जळाली. शेजारच्या लोकांच्या हे लक्षात येताच दोन्ही मुलांना एका खासगी इस्पितळात भरती केले. उपचार सुरू असतानाच गेल्या शुक्रवारी प्रियांश (११) याचा मृत्यू झाला. दुसरा मुलगा पीयूषवर (११) शर्थीचे उपचार सुरू होते. गेल्या दोन दिवसापासून पीयूषला श्वास घ्यायला त्रास होत होता. फुफ्फुसामध्ये इन्फेक्शन पसरले होते.
सोमवारी रात्री डॉक्टरांनी पीयूषला व्हेंटिलेटरवर ठेवले. मंगळवारी सकाळी ८ वाजता पीयूषने शेवटचा श्वास घेतला. संजय धरच्या जुळ्या मुलांच्या मृत्यूने कुटुंबावर शोककळा पसरली. पीयूषच्या अंत्ययात्रेत त्याच्या नातेवाईकांसोबतच मोठ्या संख्येत परिसरातील नागरिकही सहभागी झाले होते.

मी पण जिवंत राहणार नाही
माझी दोन्ही मुले गेली, आता मी पण जिवंत राहणार नाही, असे म्हणत प्रियांश व पीयूषची आई चित्रा धाय मोकलून रडत होती. या घटनेने हॉस्पिटलचे वातावरणही भावूक झाले होते. अखेर चित्रा यांना कुटुंबातील लोकांनी डॉक्टरांच्या मदतीने इंजेक्शन देऊन नियंत्रित केले. अपार्टमेंटच्या पार्किंगमध्ये अंत्ययात्रेच्यावेळी बेशुद्धसारख्या अवस्थेत चित्रा मुलाचा फोटो आणि त्याच्या मृतदेहाकडे शून्यात हरविल्यासारखे पहात होत्या. पीयूष वाचेल, या आशेवर असलेल्या वस्तीतील नागरिकांनाही या घटनेचा मोठा धक्का बसला. सर्वच जण शोकमग्न होते.