एअर अरेबियाचे प्रवासी

- शारजाह-बांगलादेश विमान : आपात्‌स्थितीत नागपूर विमानतळावर उतरले

नागपूर : रविवारी सायंकाळी आपात्‌स्थितीत डॉ. बाबासाहेब आंबेडकर आंतरराष्ट्रीय विमानतळावर उतरविण्यात आलेले विमान बऱ्याच प्रयत्नानंतर दुरुस्त न झाल्यानंतर विमानातील प्रवासी सोमवारी सकाळी दुसऱ्या विमानाने बांगलादेशच्या चटगाव येथे रवाना झाले. हे प्रवासी रात्रभर विमानतळाच्या टर्मिनल इमारतीत थांबले होते.

एअर अरेबियाचे शारजाह येथून बांगलादेशच्या चटगाव येथे जाणाऱ्या विमानाच्या इंजिनमध्ये बिघाड झाल्यानंतर रविवारी सायंकाळी नागपूर विमानतळावर उतरविण्यात आले होते. विमानात १२९ प्रवासी होते. एअरलाईन्सने दुसरे विमान पाठवून प्रवाशांना चटगावला नेण्यात आले. दुसरे विमान शारजाह येथून सकाळी ८.३० वाजता नागपुरात पोहोचले आणि सकाळी ११.२५ वाजता चटगावला रवाना झाले.

आपात्‌स्थितीत विमानाचे लॅण्डिंग झाल्यानंतर एअरलाईन्सच्या निर्णयानुसार प्रवाशांच्या निवासाची व्यवस्था हॉटेलमध्ये करण्यात येते. पण कंपनीने प्रवाशांना विमानतळाच्या टर्मिनलमध्ये थांबविण्याचा निर्णय घेतल्याची माहिती सूत्रांनी दिली. एअरलाईन्सच्या या निर्णयावर अनेक प्रवाशांनी नाराजी व्यक्त केली होती. परंतु प्रवाशांच्या नाश्ता व जेवणाची व्यवस्था कंपनीने केली होती.