दरोड्याचा कट पोलिसांनी उधळला

लोकमत न्यूज नेटवर्क

नागपूर : ज्वेलर्स लुटण्याच्या तयारीत असलेल्या चार सशस्त्र गुंडांना यशोधरा नगर पोलिसांनी अटक केली. त्यांच्या ताब्यातून घातक शस्त्रे जप्त करण्यात आली. शेख सुलतान शेख मोहम्मद (वय २४, रा. संघर्ष नगर), शेख वजीर शेख याकूब (वय २३, रा. संघर्ष नगर), शुभम ऊर्फ चुक्का छोटेलाल बिरहा (वय २६, रा. संतोष नगर) आणि दशरथ ऊर्फ गुस नरोत्तम शाहू (वय २३, रा. गरीब नवाज नगर) अशी अटक करण्यात आलेल्या गुंडांची नावे आहेत.

यशोधरा नगर पोलिसांचे पथक बुधवारी मध्यरात्री संत नामदेव नगरात गस्त करीत असताना नाल्याजवळ त्यांना काही आरोपी संशयास्पद अवस्थेत दिसले. पोलिसांनी त्यांच्याकडे धाव घेऊन उपरोक्त चौघांना पकडले. त्यांच्याकडून एक छर्ऱ्याची बंदूक, तीन तलवारी, मिरची पावडर आणि नायलॉन दोरी जप्त करण्यात आली. त्यांची चौकशी केली असता, उपरोक्त आरोपी या परिसरातील एक ज्वेलर्सचे दुकान तसेच एटीएम फोडण्याच्या तयारीत होते, अशी माहिती आरोपींनी दिली. आरोपीचे दोन साथीदार फरार असून, पोलीस त्यांचा शोध घेत आहेत.

--

आरोपी रेकॉर्डवरचे गुन्हेगार

पोलिसांच्या हाती लागलेले आरोपी रेकॉर्डवरचे गुन्हेगार आहेत. त्यांच्याविरुद्ध चोरी, घरफोडी, लूटमार तसेच हाणामारीचे गुन्हे दाखल आहेत.

--