बापरे! न्यायालयाची फसवणूक करणाऱ्यासोबत पोलिसांची पार्टी; 'असा' उघडकीस आला प्रकार

याप्रकरणी एका अधिकाऱ्याची तातडीने नियंत्रण कक्षात बदली करण्यात आली असून या कारवाईने पोलीस अधिकारी व कर्मचाऱ्यांचे धाबे दणाणले आहे.

ठळक मुद्देसंबंधित अधिकाऱ्याची नियंत्रण कक्षात बदली : पोलीस आयुक्तांनी फटकारले

नागपूर : बनावट कागदपत्रांच्या आधारे गुन्हेगारांना न्यायालयातून जामीन मिळवून देणाऱ्या टोळीने गुन्हे शाखेच्या युनिट-२ कार्यालयात दारू-कबाब पार्टी साजरी केल्याचा प्रकार उघडकीस आला आहे. पोलीस आयुक्त अमितेश कुमार आणि गुन्हे शाखेचे उपायुक्त चिन्मय पंडित यांच्या सतर्कतेने ही बाब समोर आली आहे. याप्रकरणी एका अधिकाऱ्याची तातडीने नियंत्रण कक्षात बदली करण्यात आली असून या कारवाईने पोलीस अधिकारी व कर्मचाऱ्यांचे धाबे दणाणले आहे.

गुन्हे शाखेने रॅकेटचा या पर्दाफाश करून यात सहभागी असलेल्या चार आरोपींना अटक केल्याची माहिती आहे. हे आरोपी तुरुंगात आहेत. पार्टीची घटना गेल्या आठवड्यात घडली. सेमिनरी हिल्स येथील गुन्हे शाखेचे युनिट-२ या प्रकरणाचा तपास करत आहे. सूत्रांनी दिलेल्या माहितीनुसार, आरोपींनी अधिकारी आणि जवानांसोबत पार्टी आयोजित केली होती. आरोपीच्या हितचिंतकांनी पार्टीसाठी सामानाची व्यवस्था केली. संध्याकाळनंतर आरोपी, त्याचे साथीदार आणि युनिट २ मधील काही कर्मचाऱ्यांनी पार्टी साजरी केल्याचे सांगण्यात येते. रात्री. बाहेरील लोकांची हालचाल नसल्याने पार्टीबाबत कोणालाच माहिती मिळू शकली नाही. कार्यालयाच्या आवारात सीसीटीव्ही कॅमेरे नसल्याची खात्री युनिट-२ चे अधिकारी कर्मचारीदेखील निश्चिंत होते.

दरम्यान, पोलीस आयुक्त अमितेश कुमार आणि गुन्हे शाखेचे उपायुक्त चिन्मय पंडित यांना या पार्टीची माहिती मिळाली. त्यांनी युनिट-२ च्या अधिकारी व कर्मचाऱ्यांना खडसावले. नियंत्रण कक्षात पाठवलेल्या अधिकाऱ्याला विनाकारण शिक्षा करण्यात आल्याचे बोलले जात आहे. ज्याच्या संमतीने हा कारभार झाला त्या अधिकाऱ्यावरदेखील कठोर कारवाई अपेक्षित होती.  न्यायालयाची फसवणूक करून गुन्हेगारांना मदत करणाऱ्या आरोपींना चांगल्या कोठडीची 'सुविधा आणि पार्टीची परवानगी देणे ही अत्यंत गंभीर घटना आहे. दोषींवर कठोर कारवाई करूनच योग्य संदेश दिला जाऊ शकतो.

मटका किंगने केला अधिकाऱ्याचा सत्कार

सूत्रांनी दिलेल्या माहितीनुसार, फुटाळा येथील कुख्यात मटका किंग भल्ला याने दोन महिन्यांपूर्वी परिसरात सार्वजनिक भोजनाचे आयोजन केले होते. या कार्यक्रमात युनिट-२ च्या अधिकाऱ्याचा सत्कार करण्यात आला होता व भल्लाने सोशल मीडियावर फोटोदेखील शेअर केला होता.