इयत्ता पहिली ते सातवीचे वर्ग सुरू करण्यास १५ डिसेंबरपर्यंत स्थगिती; मनपा आयुक्त राधाकृष्णन् बी. यांचे आदेश

Nagpur News कोरोनाचा नवीन विषाणू ओमायक्राॅनचा प्रादुर्भाव लक्षात घेता, नागपूर महापालिका क्षेत्रातील इयत्ता पहिली ते सातवीपर्यंतचे वर्ग सुरू करण्यास पुन्हा १५ डिसेंबरपर्यंत स्थगिती दिली आहे. मनपा आयुक्त राधाकृष्णन् बी यांनी यासंबंधीचे आदेश शुक्रवारी जारी केले.

 

नागपूर : कोरोनाचा नवीन विषाणू ओमायक्राॅनचा प्रादुर्भाव लक्षात घेता, नागपूर महापालिका क्षेत्रातील इयत्ता पहिली ते सातवीपर्यंतचे वर्ग सुरू करण्यास पुन्हा १५ डिसेंबरपर्यंत स्थगिती दिली आहे. मनपा आयुक्त राधाकृष्णन् बी यांनी यासंबंधीचे आदेश शुक्रवारी जारी केले.

कोरोनाविषयक परिस्थितीचा आढावा घेऊन पुढील आदेश १५ डिसेंबरनंतर जारी करण्यात येतील. मात्र मनपा क्षेत्रातील इयत्ता ८ वी ते १२ वीपर्यंतचे वर्ग पूर्वीप्रमाणेच सुरू राहतील.

महाराष्ट्र शासनाने इयत्ता पहिली ते सातवीपर्यंतचे वर्ग सुरू करण्यासंदर्भात सूचना दिली होती. मात्र मनपा आयुक्तांनी नवीन कोरोना व्हेरियंटचा धोका लक्षात घेऊन या वर्गातील शाळा सुरू करण्याला स्थगिती दिली आहे. आयुक्तांनी हा निर्णय साथरोग अधिनियम १८९७ व आपत्ती व्यवस्थापन कायदा २००५ अन्वये प्राप्त अधिकारानुसार घेतला आहे. शिक्षण विभागाद्वारे जारी करण्यात आलेल्या परिपत्रकानुसार इयत्ता १ ली ते ७ वीपर्यंतचे नियमित वर्ग पुढील आदेशापर्यंत पूर्णत: बंद राहतील. मात्र या वर्गांचे ऑनलाईन शिक्षण सुरू राहील.

यासंदर्भात निर्गमित केलेले आदेश, मार्गदर्शक सूचना व त्यानुसार लागू असणारे प्रतिबंधात्मक आदेश व उपाययोजना पुढील आदेशापर्यंत लागू राहतील. कोविड - १९ च्या प्रतिबंधासाठी या कार्यालयाद्वारे वेळोवेळी निर्गमित करण्यात आलेल्या आदेशाचे, मार्गदर्शक सूचनांचे उल्लंघन करणारी व्यक्ती आपत्ती व्यवस्थापन कायदा २००५ चे कलम ५१ ते ६०, तसेच भारतीय दंडसंहितेचे कलम १८८ नुसार, अन्य कायदेशीर तरतुदीनुसार कार्यवाहीस पात्र राहील.

कोविड नियमांचे पालन करा

सध्या कोरोना विषाणूचा नवा प्रकार "ओमायक्रॉन" आढळून आला असून जागतिक आरोग्य संघटनेने या विषाणू प्रकारास व्हेरियंट आफ कंर्सन म्हणून जाहीर केले आहे. त्यामुळे नागरिकांनी सर्व कोविड नियमांचे पालन करावे आणि घराबाहेर पडताना मास्क, सतत सॅनिटायझर आणि सामाजिक अंतर राखून व्यवहार करावेत, असे आवाहन आयुक्त राधाकृष्णन् बी यांनी केले आहे.