मैत्रिणीच्याच प्रियकराने केला बलात्कार

लोकमत न्यूज नेटवर्क

नागपूर : मैत्रिणीच्या प्रियकरानेच एका अल्पवयीन मुलीवर बलात्कार केला आहे. अजनी पोलिसांनी घटनेच्या सूत्रधारासह चार आरोपींना अटक केली आहे. यात अमित लोखंडे (३२, रा. कैलाशनगर), प्रशित गोटे (२५), विशाल ऊर्फ दत्तू दाभणे व बिट्टू वाघमारेचा सहभाग आहे.

पीडित १६ वर्षीय विद्यार्थिनीच्या मैत्रिणीची अमित लोखंडेसोबत मैत्री आहे. अमित व अन्य तिघे आरोपी गुन्हेगारी पार्श्वभूमीचे आहेत. पीडित विद्यार्थिनीही अमितला ओळखत होती. ती मंगळवारी दुपारी ४.३० वाजता आपल्या मैत्रिणीसह अमित लोखंडे याला भेटायला गेली होती. दरम्यान, अमितने विद्यार्थिनीला दत्तूच्या घराजवळील फ्लॅटमध्ये नेले. तेथे बेडरूममध्ये चाकूचा धाक दाखवून तिच्यावर बलात्कार केला. यावेळी विद्यार्थिनीच्या मैत्रिणीला प्रशिक गोटे यांनी चाकूचा धाक दाखवत शांत राहण्यास बाध्य केले. फ्लॅटच्या बाहेर दत्तू दाभणे व कौैस्तुभ वाघमारे उभे होते. पीडितेने आपल्या कुटुंबीयांसोबत अजनी ठाण्यात पोहोचून तक्रार दाखल केली आहे. पोलीसांनी बलात्कार, धमकावणे व शस्त्र निरोधक कायद्याअंतर्गत प्रकरणाची नोंद करून आरोपींना अटक केली आहे.

दत्तू दाभणेच्या विरोधात यापूर्वीही बलात्कार, मद्य तस्करीसह अनेक प्रकरणांची नोंद आहे. परिसरात त्याचा धाक आहे. ज्या फ्लॅटमध्ये विद्यार्थिनीवर बलात्कार केला, त्यावर दत्तूचाच कब्जा आहे. फ्लॅट मालकाचा शोध घेऊन विचारपूस केली जाण्याची शक्यता आहे. घटनास्थळ हे दाट वस्तीचे आहे. दुपारच्या वेळी लोक घरी असतात. घटनेच्या वेळी विद्यार्थिनीने किंवा तिच्या मैत्रिणीने आरडाओरड केला असता तर तेव्हाच हे प्रकरण उघडकीस आले असते. आरोपी कुख्यात गुन्हेगार आहे, ही बाब विद्यार्थिनी व मैत्रिणीला माहीत असतानाही त्यांनी भेटायला जाणे कोड्यात पाडणारे आहे.

............