राज्यातील विद्यापीठांमध्ये लवकरच प्राध्यापक भरती

लोकमत न्यूज नेटवर्क

नागपूर : राज्यातील विद्यापीठांमध्ये प्राध्यापक भरतीची मागणी जोर धरते आहे. या भरतीसाठी शासन प्रयत्न करीत असून वित्त विभागानेदेखील मंजुरी दिली आहे. लवकरच प्राध्यापक भरतीला सुरुवात होईल, असे प्रतिपादन उच्च व तंत्रशिक्षण मंत्री उदय सामंत यांनी केले. पूर्व विदर्भाच्या दौऱ्यावर आले असताना मंगळवारी जिल्हाधिकारी कार्यालयात आयोजित पत्रपरिषदेदरम्यान ते बोलत होते.

प्राध्यापक भरतीसंदर्भात एक उच्चस्तरीय चौकशी समिती स्थापन करण्यात आली असून, समितीने मान्यता दिलेली सर्व प्राध्यापकांची पदे लवकरच भरली जाणार आहेत. राज्यात सहायक प्राध्यापकांची १५ हजारांहून पदे रिक्त आहेत. अगोदरचे युती सरकार व आताचे महाविकास आघाडी सरकारमध्येदेखील भरती प्रक्रिया सुरू होऊ शकलेली नाही. नेट-सेट पात्रताधारक तसेच पीएचडी झालेल्या उमेदवारांकडून भरतीसंदर्भात मागणी होत आहे. प्राध्यापक भरती करण्यासंदर्भात महाविकास आघाडी सरकार कायमच सकारात्मक आहे. वित्त मंत्रालयाच्या मान्यतेनंतर प्राध्यापक भरतीसाठी उच्चस्तरीय समिती स्थापन करण्यात आली आहे. या समितीने पदांना मंजुरी दिली असून, त्यांच्या सूचनेनुसार प्राध्यापक भरती लवकरच सुरू होईल, असे सामंत यांनी स्पष्ट केले.

बारावीनंतर व्यावसायिक अभ्यासक्रमांच्या प्रवेशाकडे विद्यार्थी व पालकांचे लक्ष लागले आहे. व्यावसायिक अभ्यासक्रमांच्या प्रवेशासाठीची परीक्षा जुलै महिन्याच्या अखेरीस किंवा ऑगस्ट महिन्याच्या पहिल्या पंधरवड्यात घेण्यात येईल, असेदेखील त्यांनी सांगितले.