मद्यधुंद अवस्थेत दोघांना चिरडणाऱ्या रितिका मालू यांना तात्पुरता जामीन नाहीच

हायकोर्टाचा दणका : पुणेतील पार्शे कारसारखा भीषण अपघात

लोकमत न्यूज नेटवर्क

नागपूर : देशभर गाजत असलेल्या पुणेतील पार्शे कारसारखा भीषण अपघात करणाऱ्या नागपूरच्या ३९ वर्षीय धनाढ्य महिला रितिका उर्फ रितू दिनेश मालू यांची तात्पुरता अटकपूर्व जामीन देण्याची विनंती मुंबई उच्च न्यायालयाच्या नागपूर खंडपीठाने मंगळवारी अमान्य केली. त्यामुळे मालू यांना जोरदार दणका बसला. त्यांच्या अटकपूर्व जामीन अर्जावर न्यायमूर्ती अभय मंत्री यांच्यासमक्ष सुनावणी झाली. 

ही हृदयद्रावक घटना २५ फेब्रुवारी २०२४ रोजी मध्यरात्रीनंतर दीडच्या सुमारास मुख्य रेल्वेस्थानकाजवळच्या रामझुल्यावर घडली. रितिका मद्यधुंद अवस्थेत भरधाव वेगात मर्सिडिज कार चालवित होत्या. दरम्यान, त्यांची कार अनियंत्रित होऊन आधी रामझुल्याच्या कठड्याला धडकली व त्यानंतर कारने मोहम्मद हुसैन गुलाम मुस्तफा (३४, रा. नालसाहब चौक) व मोहम्मद आतिफ मोहम्मद जिया (३४, रा. जाफरनगर) हे दोन तरुण मित्र स्वार असलेल्या दुचाकीला जोरदार धडक दिली. त्यामुळे दोन्ही तरुण दूरवर फेकले जाऊन गंभीर जखमी झाले. घटनास्थळावरील नागरिकांनी त्यांना जवळच्या मेयो रुग्णालयात दाखल केले. त्यावेळी डॉक्टरांनी मोहम्मद हुसैनला तपासून मृत घोषित केले, तर मोहम्मद आतिफचा उपचारादरम्यान मृत्यू झाला. दोन्ही तरुण बँक फायनान्सचे काम करीत होते. त्यांना या क्षेत्रात खूप पुढे जायचे होते. परंतु, रितिकाच्या नशेने त्यांचे स्वप्न उद्ध्वस्त केले. 

तहसील पोलिसांनी रितिकाविरूद्ध भादंवि कलम ३०४ (सदोष मनुष्यवध), (निष्काळजीपणाने २७९ वाहन चालविणे), ३३६ (मानवी जीव धोक्यात टाकणारी कृती करणे), ३३८ (गंभीर जखमी करणे), ४२७ (आर्थिक नुकसान करणे) आणि मोटर वाहन कायद्यातील कलम १८४ (भरधाव वेगात वाहन चालविणे) व १८५ (दारूच्या नशेत वाहन चालविणे) या गुन्ह्यांतर्गत एफआयआर दाखल केला आहे. रितिकाने सुरुवातीला सत्र न्यायालयात अर्ज दाखल करून अटकपूर्व जामीन मागितला होता. तो अर्ज २४ मे रोजी फेटाळण्यात आला. परिणामी, त्यांनी उच्च न्यायालयात धाव घेतली आहे. या प्रकरणावर आता 13 जून रोजी पुढील सुनावणी निश्चित करण्यात आली आहे. यादरम्यान, राज्य सरकारला जामिनावर उत्तर सादर करण्याचे निर्देश देण्यात आले आहेत.