नागपुरात दरोड्याच्या तयारीतील चार भामटे गजाआड

दरोड्याच्या तयारीत असलेल्या पाचपैकी चार भामट्यांना तहसीलच्या पोलीस पथकाने सोमवारी रात्री जेरबंद केले. त्यांच्याकडून घातक शस्त्रे आणि मिरची पावडरही जप्त करण्यात आली.

ठळक मुद्देशस्त्र जप्त, एक फरार तहसील पोलिसांची कामगिरी

लोकमत न्यूज नेटवर्क
नागपूर : दरोड्याच्या तयारीत असलेल्या पाचपैकी चार भामट्यांना तहसीलच्या पोलीस पथकाने सोमवारी रात्री जेरबंद केले. त्यांच्याकडून घातक शस्त्रे आणि मिरची पावडरही जप्त करण्यात आली.
तहसील ठाण्यातील पोलीस पथक सोमवारी रात्री ९ च्या सुमारास गस्तीवर असताना हवालदार प्रमोद शनिवारे यांना माहिती मिळाली की, गार्ड लाईन परिसरात हजरत बाबा बगदी दर्गाहच्या बाजूच्या मैदानात काही गुन्हेगार लपून आहेत. ही माहिती कळताच पोलिसांनी तिकडे धाव घेतली. अंधारात काहीजण संशयास्पद हालचाली करताना दिसल्याने पोलिसांनी त्यांना गराडा घातला आणि अक्षय ऊर्फ गामा मनोज कांबळे (वय २०, रा.भानखेडा), लखन ऊर्फ रोहन शैलेष धरिया (वय २२, रा. शांतीनगर), सलमान अब्दुल रहेमान अंसारी (वय २५, रा. लाल झेंडा चौक, यशोधरानगर), मोहम्मद शाहरूख शेख रमजान (वय २३, रा. यशोधरानगर) या चौघांना जेरबंद केले. त्यांचा साथीदार इकबाल अहमद एहसान अहमद (वय २५, रा. अंसारनगर, मोमिनपुरा) अंधाराचा फायदा उठवत पळून गेला. पकडलेल्या आरोपींकडून पोलिसांनी एक तलवार, एक चाकू, रॉड, दोरी आणि मिरची पावडर जप्त केली. त्यांच्याविरुद्ध विविध कलमानुसार गुन्हा दाखल करून त्यांना अटक करण्यात आली. पळून गेलेल्या इकबालचा पोलीस शोध घेत आहेत.