‘रोमिओ’ झाला हिंसक, विनयभंग करत विद्यार्थिनीला जीवे मारण्याची धमकी

आईच्या सतर्कतेमुळे आरोपी अटकेत

नागपूर : मैत्री असताना त्याला प्रेमप्रकरणात बदलण्याचा प्रयत्न करणाऱ्या रोडरोमियोला विद्यार्थिनीने भाव न दिल्याने तो हिंसक झाला व त्याने तिच्या घरी जाऊन तमाशा केला. इतक्यावर तो थांबला नाही तर तिचा विनयभंग करत तिला जीवे मारण्याची धमकी दिली. तिच्या आईने योग्य वेळी सतर्कता दाखवत पोलिसांना फोन लावल्याने मुलीवर हल्ला करण्याचे मनसुब्यांवर पाणी फेरल्या गेले. एखाद्या चित्रपटाला शोभेल असा प्रकार राणाप्रतापनगर पोलीस ठाण्याच्या हद्दीत घडला. पोलिसांनी आरोपीला अटक केली आहे.

संजू गिरीजाशंकर तिवारी (१८, शताब्दी चौक, रामेश्वरी) असे आरोपीचे नाव आहे. प्रतापनगर पोलीस ठाण्याच्या हद्दीत राहणाऱ्या एका महाविद्यालयीन तरुणीशी त्याची ओळखी होती. तो लहानपणी तिच्याच घराजवळ राहत होता. ओळखीतून त्याने तिच्याशी बोलणे सुरू केले व दोघांमध्ये मैत्री झाली. मात्र एका वर्षाअगोदर संजुमध्ये प्रेमाचे भूत शिरले व त्याने तिला प्रपोझ केले.

विद्यार्थिनीने त्याला नकार दिला. मात्र त्याने तिचा पिच्छा सुरूच ठेवला व महाविद्यालयात येता जाता तिचा तो पाठलाग करायचा. संबंधित विद्यार्थिनी व तिच्या आईने त्याला हटकले होते, तसेच त्याच्या आईलादेखील त्याच्या वागण्याची कल्पना दिली होती. मात्र त्याच्यावर कसलाच फरक पडला नाही. तो तिला त्रास देत धमकी द्यायचा.

सोमवारी रात्री साडेनऊच्या जवळपास तो तिच्या घरासमोर आला व त्याने अश्लील भाषेत बोलण्यास सुरुवात केली. त्याने तिला सर्वांदेखत जीवे ठार मारण्याचीदेखील धमकी दिली. तिच्या आईने लगेच पोलिसांना फोन केला. प्रकरणाचे गांभीर्य लक्षात घेता पोलिसांचे पथक लगेच घटनास्थळी पोहोचले. त्यावेळी तो तेथेच होता. पोलिसांना पाहून त्याने पळ काढण्याचा प्रयत्न केला. मात्र त्याला स्थानिक रहिवाशांच्या मदतीने पोलिसांनी पकडले. त्याच्या खिशातून चाकू जप्त करण्यात आला. विद्यार्थिनीच्या आईने केलेल्या तक्रारीवरून आरोपी संजुविरोधात गुन्हा नोंदवत त्याला अटक करण्यात आली.