सख्खा भाऊ बनला वैरी

लोकमत न्यूज नेटवर्क

नागपूर - वारंवार मनाई करूनही लहान भाऊ बाथरूम वापरत असल्याच्या क्षुल्लक कारणावरून मोठ्या भावाने त्याला लोखंडी रॉडने मारून गंभीर जखमी केले. वाठोडा पोलीस ठाण्याच्या हद्दीत बुधवारी रात्री १०.३० च्या सुमारास ही घटना घडली.

स्वप्निल पांडुरंग बनकर (वय २९) असे जखमीचे तर राहुल पांडुरंग बनकर (वय ३१)असे आरोपीचे नाव आहे. स्वप्निल आणि राहुल हे दोघे सख्खे भाऊ आहेत. ते जुना भंडारा मार्गावरील प्रजापती नगरात एकाच घरात वेगवेगळ्या खोल्यांमध्ये राहतात. बाथरुम वापरतो म्हणून राहुल स्वप्निलला वारंवार विरोध करीत होता. त्याला न जुमानता स्वप्निलने त्याचे बाथरूम वापरणे सुरूच ठेवल्याने त्यांच्यात नेहमीच वाद होत होता. बुधवारी रात्री असेच झाले. वारंवार सांगूनही तू ऐकत नाही, असे म्हणत राहुलने शिवीगाळ सुरू केली. तुला आता मारूनच टाकतो, असे म्हणत आरोपी राहुलने स्वप्निलवर स्टीलच्या रॉडने आणि लोखंडी बादलीने हल्ला चढवला. डोक्यावर, छातीवर जबर फटके हाणल्याने स्वप्निल गंभीर जखमी झाला. आरडाओरड ऐकून शेजारी धावले. त्यांनी स्वप्निलला आरोपीच्या तावडीतून सोडवल्यानंतर इस्पितळात दाखल केले. मिळालेल्या माहितीवरून वाठोडा पोलिसांनी आरोपी राहुलविरुद्ध हत्या करण्याचा प्रयत्न केल्याच्या आरोपावरून गुन्हा दाखल केला.

----