महिलांना घडविण्यासाठी ‘सखीं’चा गजर

- ‘ती’ला प्रोत्साहित करण्यास किशोरी शहाणे यांची उपस्थिती

लोकमत न्यूज नेटवर्क

नागपूर : मुळातच मनाने कणखर असलेल्या महिलांना वर्तमानात एकाच वेळी दोन फळींवर स्वत:ला सिद्ध करावे लागत आहे. कुटुंब सांभाळण्याचे कौशल्य त्यांच्यात उपजतच आहे आणि २१व्या शतकात स्वत:च्या इच्छा-आकांक्षांना मिळालेले भरारीचे पंख विस्तारण्याचा भावही त्यांच्यात आहेत. अशा दुहेरी जबाबदारीतही स्वत:ला सिद्ध करण्याची किमया महिला साधते आहे. पुरुषांच्या खांंद्याला खांदा मिळवून पुढे चालण्याचा काळ आता जुना झाला. महिला आता एकहाती नेतृत्व स्वीकारत आहेत. विविध क्षेत्रात त्यांचे स्वत:चे अस्तित्व निर्माण झाले आहे. या सर्व यशस्वी महिला ‘लोकमत’च्या व्यासपीठावर मंगळवारी एकत्र आल्या होत्या. आम्ही घडलो आणि आता आमच्यासारख्याच दुसऱ्या महिलांना घडविण्यासाठी त्यांची ‘सखी’ होण्याचा गजर त्यांनी यावेळी केला. एकमेकांना साहाय्य करत, एकमेकांच्या मैत्रिणी होत गरुडझेप घेण्याचा निर्धार त्यांनी यावेळी केला.

स्व:कर्तृत्वाने विविध क्षेत्रे पादाक्रांत करणाऱ्या कर्तृत्ववान महिलांचा जीवनपट मांडलेल्या ‘लोकमत वुमेन ॲचिव्हर्स कॉफी टेबल बुक’चा प्रकाशन सोहळा मंगळवारी रामदासपेठेतील हॉटेल सेंटर पाईंटमध्ये पार पडला. रोकडे ज्वेलर्स, वाघमारे मसाले, ऑलिव्ह रेसाॅर्ट आणि विदर्भ मीडियाच्या सहयोगाने हा सोहळा पार पडला. यावेळी विशेष पाहुणे म्हणून प्रसिद्ध अभिनेत्री किशोरी शहाणे उपस्थित होत्या तर प्रमुख पाहुणे म्हणून रोकडे ज्वेलर्सचे संचालक राजेश रोकडे, वाघमारे फुड प्रॉडक्ट्स प्रा. लि.चे संचालक प्रकाश वाघमारे, ऑलिव्ह रेसॉर्ट ॲण्ड विला च्या संचालिका संध्या चौकसे आणि विदर्भ मीडियाचे व्यवस्थापकीय संचालक राजेश रंगारी उपस्थित होते. या मान्यवरांच्याच हस्ते कॉफी टेबलचे प्रकाशन करण्यात आले. तत्पूर्वी ‘लोकमत सखी मंच’च्या संस्थापिका स्व. ज्योत्स्ना विजय दर्डा यांचे स्मरण करण्यात आले. कॉफी टेबल बुकचे लेखन आणि संपादन वर्षा बासू यांचे आहे तर छायाचित्रांकण महेश टिकले यांचे आहे. यावेळी अनामिका रोकडे व संध्या चौकसे यांचा विशेष सत्कार करण्यात आला. प्रास्ताविक सखी मंचच्या संयोजिका नेहा जोशी यांनी केले. संचालन प्रसिद्ध निवेदिका श्वेता शेलगावकर यांनी केले तर आभार पूनम तिवारी-महात्मे यांनी मानले.

कर्तृत्ववान महिलांचा सत्कार

कॉफी टेबल बुकमध्ये जीवनपट मांडलेल्या कर्तृत्ववान महिलांचा यावेळी किशोरी शहाणे व प्रायोजकांच्या हस्ते सत्कार करण्यात आला. ॲड. तेजस्विनी खाडे, नीलिमा बावणे, सरिता फुंडे, दीपाली तुमाने, दर्शना नवघरे, डॉ. प्रीती मानमोडे, धनश्री गंधारे, स्नेहा बोंद्रे, मैथिली कोवे, रचना वझलवार, डॉ. मनीषा यमसनवार, प्रा. रसिका चाफले, शुभांगी मेंढे, डॉ. आश्लेषा अकीनवार, अनघा वैद्य, अर्चना वांदिले, डॉ. दीपा नंदनवार, लतेश्वरी काळे, नलिनी लांजेवार, नीलिमा रामटेके, रेखा तंवर, रूपाली कोडेवार-मोरे, परिणीता मातुरकर, वर्षा बारई, संघमित्रा मस्के, सोनाली देशपांडे, संगीता सूर्यवंशी, स्मिता मिरे, भारती तिडके, मीना भागवतकर, हेमा डाबरे, प्रा. डॉ. माधुरी नासरे, मंगला कारेमोरे, जयश्री बोरकर, अर्चना सारवे-बावणे, डॉ. अंशुजा किंमतकर, कल्याणी भुरे, मेघा नारनवरे, प्रणाली सरटकर, अर्चना हरडे, सुचिता आगाशे, डॉ. शीतल बल्लेवार-कोकुलवार, डॉ. इंदिरा सपाटे, ॲड. सोनिया गजभिये, मंजूषा चकनलवार, डॉ. माधवी अंभोरे-सांगोळकर या कर्तृत्ववान महिलांना ट्राॅफी आणि कॉफी टेबल बुक प्रदान करून सन्मानित करण्यात आले.

सखींनो, अंतर्मनाने तरुण व्हा : किशोरी शहाणे

मी तरुण म्हणजे काय तर माझे अंतर्मन तरुण असणे गरजेचे आहे. महिलांनी स्वत:च्या कौटुंबिक जबाबदाऱ्या पार पाडताना स्वत:विषयीच्या जबाबदारीकडेही लक्ष देणे गरजेचे आहे. आपण स्वत: अंतर्मनाने तरुण असू तर आपल्यावाटे कुटुंबही सतत प्रेरित होईल आणि स्वत:च्या कर्तृत्वालाही योग्य तऱ्हेने चालना देता येईल, असे आवाहन सुप्रसिद्ध अभिनेत्री किशोरी शहाणे यांनी यावेळी उपस्थित सखींना केले.

दी नाईट थिंकर्सचे सादरीकरण

यावेळी महिलांच्या मनोरंजनाकरिता दी नाईट थिंकर्सच्या वतीने संगीतमय कार्यक्रमांचे सादरीकरण झाले. यात गिटार वादन व गायन साहिल गजभिये, कीबोर्डवर ऋषभ ढोमणे, ड्रमवर जैनम शहा यांचा समावेश होता.