स्कॉर्पिओची धडक, दोन मित्र जखमी, एकाचा मृत्यू

भरधाव स्कॉर्पिओने धडक दिल्यामुळे ट्रीपलसीट जाणाऱ्या मित्रांपैकी एकाचा मृत्यू झाला.

नागपूर : भरधाव स्कॉर्पिओने धडक दिल्यामुळे ट्रीपलसीट जाणाऱ्या मित्रांपैकी एकाचा मृत्यू झाला. तर दोघे गंभीर जखमी झाले. ही घटना हुडकेश्वर पोलिस ठाण्याच्या हद्दीत रविवारी २६ मे रोजी मध्यरात्री १.३० वाजताच्या सुमारास घडली.

शुभम सुनिल गणेर (३०, रा. न्यु सुभेदार ले आऊट, हुडकेश्वर) असे या अपघातात मृत्यू झालेल्या मित्राचे नाव आहे. तर रजत हिरालाल बेले (२६, रा. श्रीरामनगर, उदयनगर, हुडकेश्वर) आणि अतुल विनायक रामटेके (४१, रा. न्यु सुभेदार ले आऊट, हुडकेश्वर) अशी गंभीर जखमी झालेल्या मित्रांची नावे आहेत. रविवारी रात्री १.३० वाजता रजत आपली दुचाकी क्रमांक एम. एच. ४९, बी. जी-७३८१ ने आपले मित्र अतुल आणि शुभमसोबत ट्रीपलसीट जात होता. पिपळा रेसिडेन्सी लॉनसमोरून जात असताना मागून येणाऱ्या स्कॉर्पिओ क्रमांक एम. एच. १५, डी. सी-९४२७ च्या चालकाने आपल्या ताब्यातील वाहन भरधाव वेगाने व निष्काळजीपणे चालवून त्यांच्या दुचाकीला जोरदार धडक दिली.

यात तीघेही दुचाकीखाली पडून गंभीर जखमी झाले. त्यांना उपचारासाठी मेडिकलमध्ये नेण्यात आले. तेथे डॉक्टरांनी शुभमला तपासून मृत घोषित केले. तर जखमी रजत आणि अतुलचा उपचार सुरु आहे. रजतने दिलेल्या तक्रारीवरून हुडकेश्वर पोलिसांनी स्कॉर्पिओ चालकाविरुद्ध कलम २७९, ३३८, ३०४ (अ), ४२७ नुसार गुन्हा दाखल करून त्याचा शोध सुरु केला आहे.