पत्नीने गळफास घेतल्याचे दिसताच पतीचा घरातून पळ

नातेवाइकांचा घातपाताचा संशय : एकाच दिवशी दोन आत्महत्या

नागपूर : शहरातील दोन विवाहित महिलांनी गळफास घेऊन आत्महत्या केल्याच्या घटना वाडी आणि वाठोडा पोलिस ठाण्याच्या हद्दीत घडल्या आहेत. भोमेश्वरी मनोज रहांगडाले (वय २५, रा. सूरजनगर, भांडेवाडी) आणि प्रणाली सुशील घोडेस्वार (वय २५, पालकरनगर, आठवा मैल) असे आत्महत्या केलेल्या महिलांची नावे आहेत.

पहिल्या घटनेत वाठोडा पोलिस ठाण्याच्या हद्दीतील भोमेश्वरी आणि मनोज यांचे वर्षभरापूर्वीच लग्न झाले होते. ते मूळचे मध्यप्रदेशातील बालाघाट येथील रहिवासी असून कामाच्या शोधात ते नागपुरात आले. मनोजला दारूचे व्यसन होते. मनोजच्या रोजच्या दारू पिण्यामुळे ती कंटाळली होती. तो दारू पिऊन रोज मारहाण करीत होता. त्यामुळे भोमेश्वरीने शनिवारी रात्री दहा वाजता घरात गळफास घेऊन आत्महत्या केली. दारूच्या नशेत असलेल्या मनोजला पत्नी गळफास घेतलेल्या अवस्थेत दिसल्यामुळे त्याने घरातून पळ काढला. तो अद्यापही बेपत्ता असल्यामुळे नातेवाइकांनी घातपाताचा संशय व्यक्त केला आहे.

दुसऱ्या घटनेत प्रणाली आणि सुशील घोडेस्वार यांचे दीड वर्षांपूर्वीच लग्न झाले होते. तेव्हापासून प्रणाली ही नेहमी आजारी राहत होती. तिच्यावर उपचारही सुरू होते. सुशील हे आयुध निर्माणीत कामाला आहेत. रविवारी सकाळी दहा वाजता प्रणालीने घरात गळफास घेऊन आत्महत्या केली. याप्रकरणी वाडी पोलिसांनी आकस्मिक मृत्यूची नोंद केली.