धक्कादायक! अवैध सावकाराकडून शेतकरी महिलेला अर्धवस्त्र करून मारहाण

२० जून रोजी अवैध सावकाराने पत्नीसह पीडित महिलेचे शेत गाठत, ताबा मिळविण्यासाठी प्रयत्न सुरू केले. दरम्यान अवैध सावकार व त्याच्या पत्नीने हातात लाठीकाठ्या धरून दामिनीला मारहाण करत शेतात हक्क गाजविण्यास सुरुवात केली.

ठळक मुद्देशेतीचा ताबा घेण्यावरून उद्भवला वादवाकेश्वर येथील प्रकार

लोकमत न्यूज नेटवर्क
नागपूर : कर्जबाजारी शेतकऱ्याची अगतिकता लक्षात घेत व्याजाने रक्कम द्यायची. पाहिजे तिथे अंगठे आणि स्वाक्षरी घेत, नंतर शेती हडपायची हा गोरखधंदा कित्येक वर्षांपासून सुरू आहे. गत दोन वर्षांपूर्वी अशाच प्रकारातून एका शेतकºयाने आत्महत्याही केली. त्यानंतर आता पुन्हा या गोरखधंद्याने तोंड वर काढले आहे. चक्क विक्रीपत्र दाखवीत शेतीचा ताबा घेण्यासाठी गेलेल्या अवैध सावकाराने आपल्या पत्नीच्या हाताने पुरुषांच्या घोळक्यात शेतकरी महिलेला धक्काबुक्की करीत मारहाण केली.
दामिनी (काल्पनिक नाव) असे पीडित शेतकरी महिलेचे नाव आहे. व्याजाचे पैसे, शेतीचे विक्रीपत्र आणि ताबा मिळविण्यासाठी अवैध सावकाराचा खटाटोप यातूनच ही निर्लज्जपणाचा कळस गाठणारी घटना घडली. दामिनीने दिलेल्या माहितीनुसार २० जून रोजी अवैध सावकाराने पत्नीसह पीडित महिलेचे शेत गाठत, ताबा मिळविण्यासाठी प्रयत्न सुरू केले. याप्रकाराला दामिनी व तिच्या पतीने विरोध केला. दरम्यान अवैध सावकार व त्याच्या पत्नीने हातात लाठीकाठ्या धरून दामिनीला मारहाण करत शेतात हक्क गाजविण्यास सुरुवात केली. उदरनिवार्हाचे साधन हिसकले जात असल्याने दामिनीने शेतात फिरत असलेला अवैध सावकाराचा ट्रॅक्टर रोखण्यासाठी प्रयत्न केला. दरम्यान सावकाराच्या पत्नीने दामिनीला साडी खेचून अक्षरश: बेअब्रू केले. हा प्रकार सुरू असताना अवैध सावकारासह ट्रॅक्टरचालक व अन्य ५-६ पुरुष शेतात उपस्थित होते. मात्र दामिनीच्या मदतीसाठी कुणीही पुढे आले नाही. हा सर्वप्रकार व्हिडिओमध्ये कैद झाला आहे.

बेअब्रूचाही व्हिडिओ
दामिनीची बेअब्रू होत असताना त्या सावकाराने कॅमेरामनच्या माध्यमातून छायाचित्र व व्हिडिओसुद्धा तयार केला, असा गंभीर आरोप दामिनीच्या पतीने केला आहे. तसा व्हिडिओसुद्धा लोकमतच्या हाती लागला आहे. यात शाब्दिक बाचाबाची, धक्काबुक्की, हातात लाठ्या आणि दामिनीला बेअब्रू करण्याचा अक्षरश: निर्लज्ज प्रकार कैद झाला आहे.

असे आहे प्रकरण
दामिनीच्या पतीच्या नावे तालुक्यातील वाकेश्वर येथे एक हेक्टर शेती आहे. नुकसानीमुळे कर्जबाजारी झालेल्या दामिनीच्या पतीने तीन वर्षांपूर्वी उमरेड येथील अवैध सावकाराकडून व्याजाने रक्कम घेतली होती. व्याजाची वाढती रक्कम देण्यासाठी त्यांनी अनेकदा सावकाराचे उंबरठे झिजविले. मात्र सावकाराने त्यास नकार दिला. अद्यापही पीडित शेतकरीच शेताची वाहीजुपी करीत आहे. अशात गत २० जून रोजी सावकार व त्याच्या पत्नीने दामिनीच्या शेतात दाखल होत, ताबा मिळविण्यासाठी उपद्व्याप केला. यावेळी सावकाराच्या पत्नीच्या नावे आपल्या शेताचे विक्रीपत्र पाहून दामिनीला धक्का बसला. याप्रकरणी १५ जून रोजी दामिनीने पोलिसात तक्रारही नोंदविली आहे.