चक्क शौचालयात गावठी दारुचा साठा, गुढीपाडव्याच्या तोंडावर २०० लीटर दारू जप्त

एका आरोपीला अटक

नागपूर : तहसील पोलीस ठाण्याच्या हद्दीत पोलिसांनी ३० हजार रुपयांची २०० लीटर मोहफुलाची गावठी दारू जप्त केली आहे. आश्चर्याची बाब म्हणजे आरोपीने चक्क घराच्या शौचालयात दारुचा साठा भरून ठेवला होता. पोलिसांनी यात एका आरोपीला अटक केली आहे. निलेश उर्फ बंटी टेंभुर्णे (४२, भानखेडा, तहसील) असे त्याचे नाव आहे.

तहसील पोलीस ठाण्यातील पथक पेट्रोलिंग करत असताना बंटी हा दारू विक्री करत असल्याची माहिती खबऱ्यांकडून मिळाली. पोलिसांनी त्याच्या घरी जाऊन विचारणा केली असता त्याने उडवाउडवीची उत्तरे दिली. पोलिसांनी त्याच्या घराची तपासणी केली असता काहीच आढळले नाही. मात्र सहज शौचालयाचे दार उघडले असता तेथे दारुचा साठा आढळून आला. त्याने दोन रबरी ट्युबमध्ये १०० लीटर दारू साठवून ठेवली होती. तर १० लीटरच्या १० डबक्यांमध्ये उरलेली १०० लीटर दारू होती. त्याने चरण गौर याचा हा माल असल्याची माहिती दिली.

पोलिसांनी बंटीला अटक केली व त्याच्याविरोधात गुन्हा दाखल केला. गौरचा शोध सुरू आहे. वरिष्ठ पोलीस निरीक्षक अनिरुद्ध पुरी, विनायक गोल्हे, संदीप बागुल, प्रविण सुरकर, संजय साहु, संदीप गवळी, कुणाल कोरचे, ओंकार राठोड यांच्या पथकाने ही कारवाई केली.