भरधाव ट्रकच्या धडकेत विद्यार्थी ठार

भरधाव ट्रकचा मोटरसायकलला धक्का लागून तरुण खाली पडला. त्यात गंभीर जखमी होऊन त्याचा मृत्यू झाला.

ठळक मुद्देभरधाव ट्रकचा मोटरसायकलला धक्का लागून तरुण खाली पडला.

लोकमत न्यूज नेटवर्क
वाडी : भरधाव ट्रकचा मोटरसायकलला धक्का लागून तरुण खाली पडला. त्यात गंभीर जखमी होऊन त्याचा मृत्यू झाला. हा अपघात वाडी पोलीस ठाण्याच्या हद्दीतील डिफेन्स गेट क्र. १ समोर गुरुवारी दुपारी १ वाजताच्या सुमारास झाला.
वैभव पवनकुमार मिश्रा (१९, रा. स्मृतिनगर, दत्तवाडी) असे मृताचे नाव आहे. तो रायसोनी अभियांत्रिकी महाविद्यालयाचा विद्यार्थी होता. महाविद्यालय सुटल्यानंतर तो एमएच-४०/एझेड-५७४ क्रमांकाच्या मोटरसायकलने येत होता. दरम्यान, डिफेन्स गेट क्र. १ कडून स्मृतिनगरकडे वळण घेत असताना सीजी-०४/जेसी-७०७५ क्रमांकाच्या ट्रकचा त्याच्या मोटरसायकलला धक्का लागला. त्यामुळे खाली पडल्याने गंभीर जखमी झाला. त्यातच त्याचा मृत्यू झाला. अपघात होताच ट्रकचालक तेथून पसार झाला. त्यानंतर तरसेमसिंग जीवनसिंग, रा. मध्यप्रदेश याला पोलिसांनी अटक केली. या प्रकरणी वाडी पोलिसांनी भादंवि ३०४ (अ) अन्वये गुन्हा दाखल करून तपास सुरू केला आहे.