गळफास घेऊन आत्महत्या

नागपूर : झेंडा चौक, संगम रोड वानाडोंगरी येथील रहिवासी अक्षय पुरुषोत्तम डाखळे (वय २७) याने गळफास घेऊन आत्महत्या केली. शनिवारी रात्री सातच्या सुमारास ही घटना उघडकीस आली. श्यामलाल मोरेश्वर डाखळे यांनी दिलेल्या माहितीवरून एमआयडीसी पोलिसांनी अकस्मात मृत्यूची नोंद केली. पुढील तपास सुरू आहे.

अशाच प्रकारे अजनी पोलीस ठाण्याच्या हद्दीतील शताब्दीनगरात राहणारे राजू बाबू अहिरराव (वय ४०) यांनी गळफास घेऊन आत्महत्या केली.

अहिरराव मूळचे मध्य प्रदेशातील शिवनीचे रहिवासी होते. ते रोजगाराच्या निमित्ताने नागपुरात राहत होते. साईनाथ शीतलाप्रसाद शर्मा यांनी दिलेल्या माहितीवरून अजनी पोलिसांनी अकस्मात मृत्यूची नोंद केली. पुढील तपास सुरू आहे.

---

तलावात मृतदेह आढळला

नागपूर : गणेशपेठ पोलीस ठाण्याच्या हद्दीतील गांधीसागर तलावात अंदाजे ५० ते ५५ वर्षे वयोगटातील एका महिलेचा मृतदेह आढळून आला. रविवारी सकाळी मिळालेल्या माहितीवरून गणेशपेठ पोलिसांनी अकस्मात मृत्यूची नोंद केली. मृत महिलेची ओळख पटविण्याचा पोलीस प्रयत्न करीत आहेत.

---

भिंतीवरून पडून तरुणाचा मृत्यू

नागपूर : अंबाझरी पोलीस ठाण्याच्या हद्दीतील युनिव्हर्सिटीच्या भिंतीवर चढलेल्या तरुणाचा खाली पडून मृत्यू झाला. लखन लेखराम मारकंडे (वय १९) असे त्याचे नाव आहे. लखन २५ मेच्या सकाळी युनिव्हर्सिटीच्या भिंतीवर चढला होता. तोल जाऊन खाली पडल्याने तो गंभीर जखमी झाला. त्याला रुग्णालयामध्ये दाखल करण्यात आले होते. उपचार सुरू असताना शनिवारी दुपारी डॉक्टरांनी त्याला मृत घोषित केले. अंबाझरी पोलिसांनी अकस्मात मृत्यूची नोंद केली. पुढील तपास सुरू आहे.

---

क्वॉरंनटाईन सेंटरमधील साहित्याची चोरी

नागपूर : पाचपावली पोलीस ठाण्याला लागून असलेल्या आणि पोलीस क्वार्टरमध्ये तयार करण्यात आलेल्या क्वारंटाईन सेंटरमधील सीलिंग फॅन, एक्झॉस्ट फॅन आणि नळ चोरट्याने काढून नेले. रविवारी ही घटना उघडकीस आली. तेथे साफसफाई करणारे आशीनगर झोनचे जमादार संदीप शंकर समुद्रे यांनी दिलेल्या तक्रारीवरून पाचपावली पोलिसांनी चोरीचा गुन्हा दाखल केला.

---

कुख्यात प्रवीण शाहू हद्दपार

नागपूर : कळमना पोलीस ठाण्याच्या हद्दीत राहणारा कुख्यात गुंड प्रवीण ऊर्फ अनुप सत्यनारायण शाहू (वय २२) याला पोलीस उपायुक्त नीलोत्पल यांनी दोन वर्षांसाठी नागपुरातून हद्दपार केले. शाहू हा कुख्यात गुंड असून, त्याच्यावर अनेक गंभीर गुन्हे दाखल आहेत.

---