वस्तोवस्ती, गल्लोगल्ली फिरताहेत ‘सुपर स्प्रेडर’

यांना कोण आवरणार : कोरोनाचे भान नाही, तोंडावर मास्क नाही

नागपूर : लॉकडाऊनमुळे एकीकडे करोडो रुपयांचा व्यापार बुडतो आहे. दररोज १० ते १५ लोकांचे जीव जात आहे. हातावर पोट असणाऱ्यांची उपासमार होत आहे. अडीच हजारांपर्यंत रुग्ण पॉझिटिव्ह निघत आहे. पोलिसांनी जागोजागी बंदोबस्त लावला आहे. पण काही टवाळखोर सुपर स्प्रेडर म्हणून वस्तोवस्ती गल्लोगल्ली फिरत आहेत. बंद व्यापारी पेठेच्या आड या टवाळखोरांचे दारूचे गुत्ते सुरू आहेत. या कडेकोट बंदमध्येही खर्रा, दारूही मिळत आहे.

वस्त्यांमधील चौक, बंद दुकानांचे शेड, पानठेले, चहा कॅन्टिनच्या आड काही लोक घोळक्याने बसलेले शहरातील बहुतांश भागात आढळले. गंजीफा कुटणे, गप्पा ठोकणे, मोबाईलद्वारे सिनेमा बघणे, खर्रा, गुटखा चघळणे हे सर्व प्रकार गल्ली-वस्त्यांमध्ये दिसून आले. घोळका करून बसणाऱ्यांना कोरोनाची कुठलीही भीती दिसून येत नाही. तोंडावर मास्क नाही, बसल्या ठिकाणी खर्ऱ्याच्या मारलेल्या पिचकाऱ्या, सोशल डिस्टन्सिंग, सॅनिटायझर हे तर दूरच आहे. या टवाळखोरांमध्ये युवा वर्ग मोठ्या प्रमाणात आहे. यांना हटकायलाही कुणाची हिंमत नाही. कोरोनामुळे कामधंदे बंद असल्याने या टवाळखोरांचा हा ठिय्याच झाला आहे.

- पोलीस दिसताच काढतात पळ

शहरातील महत्त्वाच्या रस्त्यावर, चौकांमध्ये पोलिसांनी बंदोबस्त लावला आहे. पण गल्लीबोळात पोलिसांचे राऊंड होत आहेत. दुकानाच्या शेडखाली घोळका करून बसलेले हे टवाळखोर पोलिसांना बघून पळ काढत आहेत.

- पोलीसांना करावे लागले मासोळी मार्केट बंद

महापालिका प्रशासनाने बुधवारपासून दुपारी १ नंतर जीवनावश्यक वस्तूंचीही दुकाने बंद ठेवण्याचे निर्देश दिले. दुपारी १ वाजतानंतर मासोळी बाजारात फेरफटका मारला असता, पोलिसांना येऊन दुकाने बंद करावी लागली.

- शुक्रवारी तलावासमोरील रिकामटेकडे हाकलले

शुक्रवारी तलावाजवळ नेहमीच रिकामटेकड्यांची मैफिल भरलेली असते. दुचाकी वाहने पार्किंग करून चहा, सिगारेटचे झुरके मारणारे तरुण येथे बसलेले असतात. काही भिकारीसुद्धा सावलीच्या आसऱ्याने बसलेले दिसतात. परंतु बुधवारी दुपारी शुक्रवारी तलावाच्या शेजारी शुकशुकाट दिसला. पोलिसांनी येथील चहा, पानठेले बंद केल्याचे सांगण्यात आले.

- सेवासदन चौकात रिचवली जात होती दारू

व्यापारी प्रतिष्ठाने बंद असल्याने मजूर आणि परिसराली लोक विना कामाने येऊन टाईमपास करताना दिसले. एका बंद दुकानाच्या आडोशाने काही लोक दारूही पिताना आढळले. खर्ऱ्याच्या बाबतीत तर विचारूच नका, पानठेले बंद असले तरी, ठेल्याजवळ उभे राहिल्यावर विक्रेता बरोबर खर्रा आणून देत असल्याचे दिसून आले.