आईला मारहाण करणाऱ्या बापाचा मुलाने काढला काटा, चाकुने वार करून संपविले

संतप्त मुलाचे कृत्य : बजाजनगर पोलिसांनी केली अटक

नागपूर : दारु पिऊन नेहमी आई आणि मुलांना मारहाण करून त्रास देणाऱ्या बापाला पोटच्या गोळ्यानेच चाकुने सपासप वार करून संपविले. ही घटना बजाजनगर पोलिस ठाण्याच्या हद्दीत बुधवारी रात्री १० ते गुरुवारी मध्यरात्री १२.२० वाजताच्या सुमारास घडली. या प्रकरणी बजाजनगर पोलिसांनी मृतकाचा मोठा मुलगा साहिलला अटक केली आहे.

संजय शंकरराव निधेकर (वय ४५, रा. सुभाषनगर पेट्रोल पंपाच्या मागे) असे खून झालेल्या बापाचे नाव आहे. तर साहिल संजय निधेकर (वय २०) असे आरोपी मुलाचे नाव आहे. मृतक संजयच्या कुटुंबात त्याची पत्नी, २० वर्षाचा मुलगा साहिल आणि एक १९ वर्षाचा मुलगा आहे. संजय पूर्वी फर्निचरचे काम करायचा. परंतु ते काम बंद झाल्यामुळे मागील काही दिवसांपासून तो मिळेल ते काम करीत होता. अनेकदा काम न मिळाल्याने तो घरीच राहत होता. त्याची पत्नी धुणीभांडी करते. तर मोठा मुलगा साहिल मजुरी करतो.

संजयला दारुचे व्यसन होते. दारुसाठी तो नेहमीच पत्नीला आणि मुलांना मारहाण करीत होता. मुले, पत्नी बाहेर गेल्यानंतर दारुच्या नशेत तो घराची कडी आतून लाऊन घेत पत्नी, मुलांना बाहेर ठेवत होता. त्याच्या या वागण्यामुळे अनेकदा त्यांचे भांडण होत होते. घटनेच्या वेळीसुद्धा पती-पत्नीचे भांडण झाले. त्यामुळे संजयची पत्नी आपल्या लहान मुलाला घेऊन आईच्या घरी निघून गेली.

काही वेळाने तिने आपल्या लहान मुलाला पतीला पाहण्यासाठी पाठविले. परंतु शेजारी राहणाऱ्या मुलाने त्याचे वडिल अंबाझरी रोडवर विवेकानंद चौक येथे पडून असल्याचे सांगितले. त्यामुळे संजयच्या पत्नी व मुलाने तेथे जाऊन पाहिले असता कोणीतरी तिच्या पतीला मेडिकलला नेल्याचे सांगितले. मेडिकलमध्ये डॉक्टरांनी तपासून संजयला मृत घोषित केले. संजयवर चाकुने वार झाल्याचे पाहून त्याची पत्नी पिंकी निधेकर यांच्या तक्रारीवरून बजाजनगर पोलिसांनी आरोपीविरुद्ध कलम ३०२ नुसार गुन्हा दाखल केला.

चाकूने वार करून संपविले

मृत संजय नेहमीच कुटुंबीयांना दारू पिऊन त्रास देत होता. पैशांसाठी पत्नीला मारहाण करीत होता. पत्नी पिंकी धुणीभांडी करून मुलांचे पालनपोषण करीत होती. तर मोठा मुलगा साहिलही मजुरी करून घरी हातभार लावायचा. यात संजयच्या वागणुकीमुळे अख्खे कुटुंब त्रस्त झाले होते. घटनेच्या दिवशी सुद्धा संजयने भांडण केल्यामुळे त्याचा मोठा मुलगा साहिल संतापला. रागाच्या भरात त्याने चाकुने वडिलांच्या पाठीवर, डोक्यावर आणि दोन्ही हातावर वार करून त्यांना रक्ताच्या थारोळ्यात लोळवले. बजाजनगर पोलिसांनी मृतकाचा मोठा मुलगा साहिलला अटक केली असून त्याने वडिलांचा खून केल्याची कबुली दिली आहे. पुढील तपास बजाजनगर पोलिस करीत आहेत.