फोटो व्हायरल करण्याची धमकी देऊन युवतीचा विनयभंग

पाचपावली पोलिसात गुन्हा दाखल, आरोपीस अटक

नागपूर : फोटो व्हायरल करण्याची धमकी देऊनयुवतीचा विनयभंग करणाऱ्या आरोपीस पाचपावली पोलिसांनी गजाआड केले आहे.

शरद भोमदेव वर्मा (वय २१,रा.नयापूरा, प्रेमनगर, झेंडा चौक) असे अटक करण्यात आलेल्या आरोपीचे नाव आहे. एमआयडीसी पोलिस ठाण्याच्या हद्दीत राहणाऱ्या एका २२ वर्षाच्या युवतीची ओळख आरोपीसोबत २० जुलै रोजी इन्स्टाग्रामवर झाली होती. आरोपी शरद हा मॅक्सी ऑटो चालवितो. तर युवती डीएमएलटीला शिकत आहे. ओळख झाल्यानंतर आरोपी तिच्याशी नियमित चॅटींग करीत होता. तो तिला वारंवार भेटण्यासाठी बोलावित होता. परंतू युवती त्याला नकार देत होती.

घटनेच्या वेळी युवती सिताबर्डी येथे गेली असता आरोपी शरद मॅक्सी ऑटो घेऊन तिच्या जवळ आला. त्याने तिला ऑटोत बसण्यास सांगितले असता तिने नकार दिला. त्यानंतर आरोपीने तिचे फोटो व्हायरल करण्याची धमकी दिल्यामुळे ती ऑटोत बसली. आरोपी तिला पाचपावली पोलिस ठाण्याच्या हद्दीतील एका हॉटेलमध्ये घेऊन गेला. तेथे त्याने तिच्याशी जवळीक साधण्याचा प्रयत्न केला. आरोपीने तिच्या मनाला लज्जा उत्पन्न होईल असे कृत्य करून तिचा विनयभंग केला.

युवतीने विराेध केला असता आरोपीने तिला थापडा मारून शिविगाळ करून तिचा फाेन जमीनीवर आपटुन नुकसान केले व फाेटाे व्हायरल करण्याची धमकी दिली. याप्रकरणी युवतीने दिलेल्या तक्रारीवरून पाचपावलीचे सहायक पोलिस निरीक्षक प्रविण सोमवंशी यांनी आरोपीविरुद्ध कलम ३५४, ३५४ (अ), ३२३, ४२७, ५०६ नुसार गुन्हा दाखल करून आरोपीस अटक केली आहे.